Fâ il boscadôr… par sport. Interviste a Michael Del Pin, campion di “timbersport”

Michael Del Pin al è un zovin di 19 agns origjinari di Midun, un piçul comun montan te provincie di Pordenon, che l’Istât passât al à concuistât l’aur te gare austriache di taielens Austrian Rookie Cup. Sì, parcè che si fasin garis uficiâls di taielens, e no dome: a son sîs lis dissiplinis dai “tindersports”, cussì si clamin chestis garis, e si fasin ancje campionâts a nivel mondiâl. E no son dissiplinis gnovis: il prin campionât dal mont di “tai dal len” si fasè a Latrobe, in Tasmanie (Australie), intal 1891. A partî di chês bandis, i tindersports si son difondûts massime intai Stâts Unîts e Canadà, par rivâ dopo in Europe.
Michael al veve za fat viodi la sô capacitât cualchi timp prime rivant secont a Bormio te competizion internazionâl (dedicade ai zovins sot dai 25 agns) valide pal acès ai mondiâi inte categorie Rookie 2018 intal campionât talian Stihl Timbersports. An fortunât pal zovin furlan che, dopo jessi montât sul podi di Europe, al è svolât ai mondiâi: Michael si è vuadagnât il puest tant che risierve de scuadre taliane tal ambit des garis Stihl Timbersports World Championship 2017 ai prins di Novembar a Lillehammer. Incuriosîts, lu vin sintût: Michael al fevele par furlan intune biele variante di Medun.
La tô e je une passion nassude cuant che tu jeris piçûl. Continus un pôc…
E je nassude a contat cul mont dai boscadôrs; cun gno pari o lavi tal bosc par lavôr (i gjenitôrs a àn une aziende agricule e boschive a Medun ndr.) fin di cuant che o vevi 6 agns, e mi soi inamorât dal mistîr. O ai tacât a fâ timbersport a 17 agns e cumò che o ‘nd ai 19, une volte finide le scuele, al è deventât ancje un lavôr e la mê passion.
Cemût isal chest sport?
Al è tant dûr, un sport par oms e no pes feminis, parcè che al domande tant impegn e fadie; e jo mi aleni ogni dì in ogni stagjon. L’alenament al consist in esercizi fisic come che si fâs in palestre, plui solevaments di pês e ripetizions des provis che si fasin intune gare: taià çocs di len cu la manarie e cul seon. Il gno mestri al è Emanuele Crovato, un altri zovin boscadôr dal paîs, che fin chel altri an al competeve a nivel mondiâl prime di fâsi mâl e stâ fer par infortuni.
Ma la tô ise dome passion o ancje un lavôr? Vuadagnistu alc?
Ti disarai che prime di dut e je une grande passion! I premis in bêçs a son, ma a son piçui… La veretât e je che, come pardut, miôr tu rivis in classifiche plui tu cjapis. Di cualchi timp lu fâs ancje di lavôr e o speri che si rivi ancje in Italie al nivel di nazions come la Australie, dulà che lu fasin par lavôr e a puedin vivi dome di chel.
Obietîfs pal futûr?
I grancj mi ritegnin il futûr di chest sport in Italie e cualchidun al spere che jo o deventi campion talian tal zîr di cualchi an… Jo pal moment o spieti di rivâ al mondiâl de mê categorie e di fâ il miôr risultât pussibil, savint che chei altris atletis (soredut australians e canadês) a fasin chest sport di cuant che ae son nassûts (dai 5 agns in pratiche), e nol sarà facil vinci.
Al è di pôc che tu âs acompagnât ai mondiâi la scuadre taliane. Continus di cheste esperience. In merit a Lillehammer, par me e je stade une grande ocasion par fâ esperience ancje se no ai podût competi jessint che o jeri une risierve. O soi stât dongje ai fantats de nazionâl e o ai vude la oportunitât di cognossi e di fâ amicizie cui “grancj” di chest sport che a rivavin di di là dal ocean. O ai amirât gnovis tecnichis che o soi convint che mi judaran a cressi te prossime stagjon: o speri di jessi convocât titolâr pai mondiâi che si fasaran a Liverpool, cussì di podê fâ svolâ ator pal mont la bandiere dal Friûl.
di Sara Palluello