Elezions: cui che le conte e cui che nol conte

Lis elezions a son simpri plui dongje, ma il Parlament di Rome nol è mai stât cussì lontan dal Friûl. I furlans a laran a votâ ai 25 di Setembar pes elezions talianis, ma la impression vere par cui che al à a cûr i interès de nestre tiere e je che noaltris in cheste partide no contìn nuie. Di agnorums in Italie i guviers no à vude masse considerazion pe nestre int. E la situazion no cambiarà di cumò indevant, soredut daspò de riduzion dal numar dai deputâts e dai senatôrs, votade a sbreghebalon ancje dai eletôrs di chenti. La gnove configurazion e à fat a fruçons chê pocje rapresentance che o vevin, ridusintle dal 40 par cent. Cun gjonde, inceâts de antipolitiche, i furlans si son firmâts di bessôi la condane a no vê plui nissune pussibilitât di contâ intal panorame politic talian.
◆ Stant che dut câs al è dibant lamentâsi di ce che al è za sucedût, viodìn trop che a contin i temis che a tocjin in maniere specifiche il Friûl inte campagne eletorâl. La rispueste e je: nuie. Su la schede eletorâl si puedino sielzi fuarcis che a puartin indevant la nestre autonomie? No. Che a vuelin fâ cressi il rûl internazionâl de Regjon che la storie e la gjeografie i àn assegnât? No. Che a dan soluzions gnovis par rinfuarcî e ripensâ la dimension economiche dal nestri teritori cuntune gnove valorizazion des sôs risorsis? No. Che a vuelin frontâ cun fuarce i problemis de mont, dal dissest idrogjeologjic, de transizion ecologjiche viers di un gnûf model di svilup? No. E o podaressin lâ indevant cjalant dut ce che la nestre regjon e è pierdût in tiermins di sanitât, istruzion, digjitalizazion, atrativitât. La rispueste e je compagne par ogni cuistion. Ducj le contin, ma la veretât in struc e je che nuie al cambiarà in miôr.
◆ Il Friûl al è residuâl intal dibatit politic e in chest no je maravee. In altris timps o varessin fat “di bessôi”, ma la Regjon no à mendât i siei problemis nancje cul plui grant assestament di belanç de sô storie, 830 milions di euros par buine part strassâts tal mês di Lui in oparis e oparutis finanziadis cence vê un criteri clâr, plui par vê consens aes elezions che par altri. “Si à simpri fat cussì”, al è il discors che si dopre di solit par dâ reson a cui che al dopre il sô podê (e i nestris bêçs) a sô discrezion. Al è un fat dut câs che se i nestris problemis no rivìn adore a fâju pesâ nancje a Triest, cemût varessino di fâju pesâ a Rome?
◆ No je dome cuistion di “numars”, ma ancje di cualitât de rapresentance e di condivision di prospetive. Prin di dut e je la cussience di jessi popul che e mancje. A Triest, i grancj nons de politiche rapresentade su lis tv talianis (i Patuanelli, i Rosato, i Fedriga) a san di vê daûr une comunitât che i ten ai siei interès. Par chest a tegnin a ments la situazion de lôr citât, e su lis partidis decisivis si cjataran simpri dacuardi. I elets furlans invezit – se si cjatin dacuardi – al è dome su la partide dal Udin. ❚