Elena Fabian. Il profîl

Sportive di simpri (nadâ, schi alpinisim, bici di corse), Elena Fabiani – udinese di 43 agns, di profession farmaciste – e scuvierç la corse tal 2013 e za tal Otubar dal 2014 e fâs il so esordi in maratone a Vignesie concuistant il decim tierç puest cun 3 oris e 10 minûts, che al restarà il so personâl su la distance. In pôcs mês a vegnin Florence e altris garis, ma za tal 2015 e tache cu lis ultramaratonis. La prime e je chê di Asolo, là che e rive seconde su la 50 chilometris. Tal 2016 e je finisher ae 9 Colli Running (202 chilometris) e ae 100 chilometris di Asolo. E rive seconde ae 100 chilometris des Alps e tes 100 miis di Berlin («La gare che o ricuardi cun plui plasê – e conte Elena -: pe bielece dal percors, pe organizazion ecelente, pal gno stât di forme e pal acet entusiast dai abitants, mighe tant che in Italie li che la int si inrabie se e cjate lis stradis sieradis par vie di une corse»). E vinç la 6 oris di Buri e di Passons.
◆ Tal 2017 e cjape part a 12 ultramaratonis, realizant i siei personâi te 6 oris di Teodorico (68,272 chilometris), su la 12 oris a S. Giovanni Lupatoto (120,849 chilometris) e su la 24 oris a Reggio Emilia (205,270 chilometris).
◆ Tal 2018 in 9 oris e 22′ e fâs la 100 chilometris a Seregno e e concuiste il titul talian di categorie. E partecipe ai campionâts europeans assolûts di 24 oris cu la maie de nazionâl taliane in Romanie. E, dopo altris afermazions, i ven assegnât il titul talian assolût su la 24 oris a Cesano Boscone.
Tal 2019 e vinç la Ultra Milano Sanremo (285 chilometris fats in mancul di 45 oris!) e la 12 oris di Buri. In Dicembar, e siere l’an cuntun tierç puest ae 24 oris su piste a Barcelone.
◆ I plâs partecipâ a miezis maratonis e maratonis tant che pacer, ven a stâi chei atletis che in gare a àn il compit di judâ i partecipants a rivâ al travuart a un timp cronometric finâl prestabilît. ❚