EDITORIÂL – Un popul di fantasimis

✽✽ O sin di front a une gnove fase di atac ae cuistion furlane. Cence mascare e cuntun mût di fâ cence scrupui. L’ultin esempli al ven de riunion de Serracchiani cul diretôr gjenerâl de Rai, Luigi Gubitosi. Di ce àno fevelât? Testuâl dal comunicât de Regjon: de digjitalizazion te sede di Triest, de sô funzion internazionâl te aree balcaniche, di iniziativis par ricuardâ il tornâ di Triest a la Italie tal 1954, par celebrâ i 50 agns de gnove sede Rai a Triest. A àn po dopo decidût la convocazion di chê taule di confront che no si met dongje dal 2009. Vêso capît benon? La Rai di simpri e je fûr leç su lis trasmission in lenghe furlane e la Serracchiani nancje no tocje l’argoment! Che ducj i partîts, di çampe e di drete, che la comission paritetiche Stât e Regjon a vedin simpri denunziât cheste malesorte de television taliane, ae Serracchiani no i interesse un boro. Il video al va ben dome par cjalâsi tal spieli de informazion romane: par puartâ indenant i dirits dai furlans nancje un spot.
✽✽ O ai il presintiment che al sarà cussì pardut. A àn voie di fânus deventâ un popul di fantasimis.
✽✽ Cuissà parcè, mi ven tal cjâf il Tibet, scancelât come nomenance gjeografiche, storiche, religjose, culturâl dai comuniscj cinês. Vie dut. Al à di jessi dome une provincie di Pechin. Une diference fuarte e je: là jù i tibetans ju copin o ju metin in preson, culì a somein plui democratics, ma il pinsîr centralist, la ideologjie stataliste a son compagns.
✽✽ Il Tibet si clame Regjon autonome, ma dome par finte. Ancje chi o sin une regjon autonome e ancje par noaltris cheste e je simpri plui une bausie e, tal câs che e vedi di lâ indenant la propueste de riforme dal titul V, cemût che le viôt Renzi e compagnie briscule, ancje cheste specialitât e je dongje a jessi scancelade.
✽✽ Un ben o un mâl? Di sigûr di une bande al sarès l’ultin afront aes minorancis, ma di chê altre, une specialitât che simpri mancul e corispuint ae realtât e aes aspirazions dal Friûl, a ce coventie?
✽✽ O vin crodût par masse timp che daûr di cheste peraule al fos pussibil un disvilup diviers e dignitôs pe nestre int, che une classe di dirigjents politics e industriâi le varès doprade cun inteligjence e sintiment. E invezit a àn cirût di simiotâ i lôr amîs talianots e forescj, e vuê o viodìn il risultât.
Dome che, ancjemò une volte, il cont lu paìn noaltris. ❚
Dree Valcic