Al è rivât Setembar, la fin di un Istât cjalt. No tant par cuestions metereologjichis, che chês no lis àn imbrocadis come il solit: nus vevin imprometût cjaldon, nus è rivade la solite variabilitât avostane che e à fat patî i puars turiscj a Lignan. Puars ancje parcè che in câs di brut timp no puedin nancje lâ a parâsi intun bon locâl furlan, come che o vin contât tal numar di Lui.
L’Istât al è stât cjaldon, invezit, sul front de gnove leç pal furlan.
No che la cuestion nus vedi smaraveâts, che bielzà si veve tacât il mês passât cuntune biele butade di polemichis. Scuasit simpri di nivel inacetabil. I aversaris dal furlan a àn dât dongje un bestiari che al sarès di fâ un dossier pe riunion dal Bureau de Assemblee des Regjons di Europe (president Illy), che si davuelzarà a Udin dai 7 ai 9 di Novembar. Il teme al sarà dedicât a «Identitât e Diviersitât». Li sigûr i nestris politics a ciraran di fâsi biei come i rapresentants di une regjon tal cûr de Europe, multiculturâl e vie indevant. Cemût podarail Illy jessi credibil tal direzi la riunion cun dut il davoi che a àn tirât sù i politics di chenti cuintri de identitât e de diviersitât dai furlans? Par prins e tra i plui ferbints chei de sô coalizion e adiriture dal so partît!
Ma par violence e bassece di argomentazions chê che e à impressionât plui di dut e je stade la reazion dai triestins. Sburtâts dal lôr gjornâl che al à di diretôr un passât par Udin e che duncje al sa cemût che l’argoment al sedi stuzighin, a àn dât il piês di lôr cuntune schirie di letaris di sgrisulâsi.
Posizions provincialonis e fûr dai semenâts par motîfs di justizie, che finalmentri si comede un tic une situazion di dirits deneâts a di un popul; par motîf scletementri legjislatîfs, che finalmentri si fâs buine une leç taliane (la 482/99). Adiriture cuintri la lôr convenience: lis lenghis di chenti a son aromai un dai pôcs motîfs pe specialitât de regjon (chê che ju jude a supâ beçs publics, il «core business» de citât).
Cence smenteâ che i bêçs che a van ai furlans par solit a vegnin sfrutâts ben – visìnsi dal taramot – cuntune ricjadude su di lôr, che a puedin supâ di conseguence.
Par colme, la critiche e je par un provediment che nol rivuarde nuie il lôr teritori!
Insome, une proteste di panze, cence logjiche, che no si spieghe se no ricorint a categoriis come la plui sclete invidie se no adiriture dal razisim. Chest fat al è particolarmentri grâf par vie dal lôr stât di capitâl regjonâl. La rivalitât jenfri Friûl
e Triest e sameave aromai un normâl campanilisim ma chel che al è daûr a vignî fûr al è ben diviers: podìno lâ indevant governâts di une citât che nus odee? Triest e je daûr a fâ viodi une muse intolerante e duncje no buine par decidi i destins di altris.
Cemût puedie pratindi di jessi capitâl di une regjon se no sa tutelâ i dirits dai siei citadins?
A cessecûl ancje la lôr svantade partignince ae Mitteleurope, facil di pandi cuant che si à di candidâsi al Expo o a riferiment pes regjons confinantis.
Cul lôr compuartament a àn dimostrât ad implen che e je une grande bufule. La pretindude vocazion di citât mitteleuropeane, di propulsore de Euroregjon volude di Illy e cole: no san difindi la plui grande minorance che a àn presinte in regjon e pratindaressino di jessi mediatôrs jenfri Austrie, Cechie, Cravuazie, Ongjarie, Gjermanie, Polonie, Slovachie, Slovenie, Svuizare?
Sancide la provincialitât e une sorte di «margjinalitât morâl» de citadine juliane, al è simpri plui urgjent lâ indevant cu la Assamblee des Provinciis e par fortune in chest cantin al è stât fat cualchi pas indevant. In cheste suaze il rûl di «politiche foreste» dal teritori al colarès a plomp par Gurize, a chest pont pardabon la vere citât mitteleuropeane de regjon: furlane, slovene, taliane (l’ordin al è alfabetic).
A pat che e savedi zuiâ ben lis sôs brisculis, parcè che nus vegnin segnâi contraditoris di chê bande, che o contìn in chest numar. Starìn a viodi.
———————————————————-
Il numar
O vin sielzût di dedicâ il nestri «speciâl», li che ogni mês si indaghe un argoment, ae Zornade Europeane des lenghis. Plui in particolâr o vin «pontât une lint» su lis 12 minorancis tuteladis dal Stât talian – li che al è ancje il furlan – par savê a ce pont che e je la situazion dopo cualchi an de aprovazion de leç di tutele 482, fate buine tal 1999.
Ce ise la Zornade Europeane des lenghis?
Ai 26 di Setembar a puedin jessi inmaneâts events e iniziativis par garantî che i messaç, lis lezions e lis ativitâts dal 2001, l’An european des lenghis (poiât di 45 paîs europeans) no vadin pierdûts e ancjeLa Patrie dal Friûl e à volût dâ il so contribût fevelant di lenghis minoritariis e minorizadis, tacant propit de realtât dal stât talian. La idee di fissâ une Zornade des lenghis ogni an e ven dal Consei di Europe che al à declarât in maniere uficiâl che:
– La Europe e je plurilengâl e lu sarà simpri
– L’aprendiment des lenghis al ufrìs oportunitâts ai citadins
– Ognidun al è in stât di fâlu
Cun di plui, al è stât viert ancje un sît web (www.ecml.at/edl/default.asp?t=info) che al presente informazions e colegaments ae rêt dai coordenadôrs de zornade che a son in ogni stât. Il sît al à dentri un database di ativitâts che al è pussibil consultâ e che si pues inzornâ cun informazions sui events che a nassin ator pe Europe.
E duncje, come che e dîs la Europe: “In varietate concordia”, ven a stât “Unitât te diviersitât” e buine Zornade des lenghis a ducj!
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +