Sfuei Mensîl Furlan Indipendent
Archivi de Patrie

EDITORIÂL – Triest al met in taule il svuacet furlan

............


O sin rivâts insom. Lu vin dite tantis voltis che si jere di front a un moment delicât pal Friûl, ma di cemût che si son metudis lis cuestions ancje a nivel gjenerâl, mi somee che i timps a son pardabon dificoltôs.
In sumis, si trate di viodi ce che al sarà il Friûl di doman e no cun tantis fufignis “ideologjichis” ma in  concret, che al vûl dî a nivel istituzionâl.
Al podarès ancje no sucedi nuie, viodûts i risultâts dal guvier Monti e i zûcs che i partîts talians a stan fasint, ma metìn di cont che une cualchi riforme e vegni indenant su la organizazion teritoriâl de Regjon. Ce sucedaraial? Gurize cun Triest? Dome un toc, Monfalcon e circondari? Un toc cun Udin? Udin e Pordenon dutun? Lis trê provinciis furlanis e Triest citât metropolitane? Va a savê. Dut câs, une robe e je plui che clare: tal cjâf dai sorestants il menù al è za ordenât: la mignestre e je la jota triestine, garbe pai furlans, il secont plat al è svuacin di vidiel, i furlans, e par finî un cafè  cence zucar, amâr pai furlans.
Ce vuelial dî: che se cualchi riforme istituzionâl e aministrative e vignarà indenant, e sarà simpri tal interès di Triest. No dome, ma cuintri il Friûl e la sô unitât.
Chest no parcè che i triestin a son triscj, o parcè che le àn sù cui furlans, ma parcè che a san benon che, par difindi i lôr privileçs, a àn di meti sot cualchidun o almancul no vê concorince in cjase o dongje.
E chi, mi ven tal cjâf la cuestion de universitât, ma ancje de sanitât, dal Ater. Cu la scuse di sparagnâ, di razionalizâ, di evitâ apont lis concorencis, si va viers la unificazion regjonâl des struturis di fonde de nestre vite sociâl e coletive.
Al è come il roncâr che in tancj agns al è rivât a une buine produzion e che cumò al à di puartâle intune altre cantine, di travasâ il vin intune bote gnove e cambiâ etichete. Nol sarà plui il so vin. Ma la cuestion dal tocai aie insegnât alc o no?
Par no restâ dome a cjacarâ di mangjâ e di bevi, ancje se il concet di svuacet al da la idee di ce che a àn tal cjâf pal Friûl, o crôt che ai nestris sorestants, dal plui piçul aministradôr al plui grant, e vadi fate une domande sclete, spietant une rispueste parimentri clare: ce isal par lôr il Friûl? ■
DREE VALCIC

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +