EDITORIÂL. Prime che al sedi masse tart

I timps no ju decidìn noaltris, e ancje cheste e je une prove che no sin parons dal nestri destin, ma lis elezions a son simpri plui dongje.
O soi sigûr che se al fos pussibil presentâ une liste fuarte, cuntune presince sul teritori, il risultât par Tondo o Serracchiani nol sarès sigûr par nissun dai doi. Purtrop nol sarà cussì. Ancjemò une volte, o sin rivâts tal ultin de corse eletorâl cun tantis cjacaris, e bausiis, ma al moment cence alc di concret. Mi somee che cualchidun al vedi cuasi pôre di mostrâ su la schede la sô muse furlane.
Nol è il câs dai amîs, dai fradis dal Front furlan che no di vuê si stan movint par meti dongje une presince nazionalitarie furlane, cun dutis lis dificoltâts che a vegnin daûr, dispès produsudis des critichis e dal peteç.
In dute onestât, mi somee che masse int, tra chei che si proclamin furlaniscj, e sedi ancjemò presonere de ideologjie.
Un pecjât mortâl pal Friûl.
La ideologjie e fâs riferiment a une costruzion mentâl e politiche cu lis fondis te societât taliane e te sô organizazion sociâl. Di cheste impostazion a nassin lis sieltis che un moviment nazionalitari al varès di fâ: o cu la diestre o cu la çampe, cun aleancis e simpatiis viers di une o di chê altre.
Duncje, no si pues lei che cun fastidi ce che al scrîf tai siei documents il grup di “Identità e Innovazione”: “Jessi di çampe al è incompatibil cui valôrs dai furlans e in gjenar cu lis aspirazions des minorancis”. Un tic ridicul se si pense ai guviers metûts dongje di cualchi so esponent cul tricolôr di An o ae moralitât berlusconiane.
Di chê altre bande, Sandri Carozzo te rêt al declare che di front a cheste situazion, la alternative e je la formazion di une liste autonomiste di çampe, mi pâr di capî, cjapant esempli de Catalogne e dai Paîs Bascs, dulà che di timp a son presintis fuarcis e partîts nazionalitaris cun cheste caraterizazion.
Su chest pont, mi permet di osservâ che la fuarce e la influence di chescj moviments a son pussibilis dome pe presince di un partît maioritari, di guvier, tant che Convergence a Barcelone o dal Partît nazionalist basc in Euskadi.
A son une rispueste dentri un sisteme politic che si declare autonomist, se no indipendentist: viôt lis ultimis declarazions dal leader storic catalan, Puyol.
E cheste e je la ideologjie, po dopo e ven la albasie, almancul cussì le clame Adrian Cescje cuant che al scrîf che al sarès chest il sintiment che al ven acusât il Moviment Friûl, ven a stâi il sintîsi – e il compuartâsi di conseguence – diviers e miôr di ducj chei si clamin autonomiscj.
Che no se cjapi Adrian, ma cheste e je un tic veretât, parcè che al somee che il MF lis vedi fatis dutis justis, che al sedi stât dome lui la bandiere dal Friûl. E no je lade cussì di une vore di agns.
Ma butâle sul cui che al à reson nol jude nissun, ancjemò di plui se al tocje robis di une volte. Il probleme cumò al è un altri. Se di une bande il segretari De Agostini al dîs une robe juste cun “nol baste jessi cuintri un eletrodot, la Tav o altri, se no si ricognòs la cuestion furlane te sô complessitât”, al è ancje vêr che il rispiet dal teritori, l’ambient e tantis lotis sul teritori a son la sostance de bataie pal Friûl di vuê e soredut di doman.
Cemût che o ai scrit ancjemò mes indaûr, al MF i tocje, propit par rispiet de sô storie, movisi par prin pe unitât dai furlans, cence tantis fufignis, cence pôre di pierdi cuissà cuale vergjinitât.
Lis dificoltâts a son tantonis, a scomençâ des firmis pes listis, e di sigûr i partîts talians a fasaran di dut par aumentâlis.
Di front ai furlans e sta une mont alte e intrigade: si pues decidi di provâ a rivâ sù o di stâ fers, spietant la lavine.
E par lâ sù, ducj a san che si scuen meti dongje une cuardade, une scuadre di scjaladôrs. ■
DREE VALCIC