E rive la Fieste dai 3 di Avrîl dal 2016 in tun Friûl che nol è chel dal 1077 e nancje chel che, par mil agns, al à passat ogni sorte di provis, invasions e parons diferents, fin al taramot di 40 agns fa, cence mai pierdi la sô identitât.
_E rive, ai 3 di Avrîl, tant che fieste ricognossude, biadelore, de Regjon, ma e rive in tun timp là che i riferiments culturâi e sociâi a son tant cambiâts e no nus judin plui a frontâ lis sieltis de vite dal dì di vuê cence meti a risi la nestre identitât. Al ven alore indenant un grant pericul di smamîsi e di pierdisi intun mont simpri plui globâl e vualîf. Ma no vin di vê pôre, no sin ancjemò dal gjat! Invezit di fâsi gloti de dimension globâl, o vin di confrontâsi cun ce che nus propon di plui vivarôs il mont, cence mai dismenteâ cui che o sin.
_La Fieste de Patrie nus fâs tirâ fûr la nestre braùre di jessi furlans: o furnìn lis cjasis e i paîs di bandieris cu la acuile e si inmanein une vore di iniziativis. Biel e just ma nol è avonde! Finude la fieste, a son 364 dîs di vore dulà che si à di restâ furlans e chest al è plui dificil.
In ogni ambit dal vivi di ogni dî o fasìn fadie a vivi di furlans.
Cun di plui no nus judin e no nus prudelin i nestris sorestants che, fale cualchidun, no àn te agjende, e nancje tal cûr, il Friûl.
_E alore ce fâ? Prin di dut o vin di infuartî la nestre cussience furlane scomençant cul cognossi il valôr de nestre culture, de nestre storie (mai insegnade a scuele) e de nestre lenghe che o vin il dirit di doprâ. Daspò o vin di stimâ la nestre lenghe e il nestri jessi diferents ancje come une grande oportunitât di disvilup, e i esemplis no mancjin. Par prionte si scuen tirâ su une gnove classe politiche che nus rapresentedi.
_Soredut no vin mai di fâsi sotanâ tal nestri jessi. O vin di fâ valê ce che nus spiete, ancje cence masse creance. S. Pauli al scrîf al so amì Timoteu che pe une robe juste si à di dâsi di fâ opportune et importune, val a dî cun creance cun chei che a scoltin, e ancje in mût sconvenient con chei che no scoltin.
_Cence sudizion, visìnsi simpri di scuedi il just par nô e pai nestri fîs parcè che o sin a credit cul Stât talian: o vin di riclamâ une riparazion storiche dai dams di 150 agns di minorizazion de nestre lenghe e de nestre culture. La Italie, sei chê nazionaliste dal Votcent, sei chê fassiste, e sei ancje chê republicane fin in dî di vuê, e à fat di dut par improibî l’ûs public dal furlan, par ghetizâlu tal ambit de famee o de ostarie, al plui acetântlu tant che element folcloristic o di museu. Si che duncje, no stin a lassâ che chê vore e ledi indenant ma pretindìn di vivi di furlans! Opportune et importune. ❚
✒ Diego Navarria President de Assemblee de Comunitât Linguistiche Furlane
