EDITORIÂL – No ae sagre dai pampavuacs

✽✽ A fuarce di sintî a ripetile, ogni robe e pues deventâ veretât. Alore, par 50 agns nus àn dite che cheste Regjon si clame “Friuli-Venezia Giulia” (e no a câs a cirin di tirâ vie chel tratut che al da tant fastidi a cualchidun…) e no je vere, parcè che la Vignesie Julie e je une invenzion linguistiche e no corispuint a nissune realtât fisiche, storiche e gjeografiche. Ma provait vuê a dimostrâ il contrari, ancje tal cjâf di tancj furlans.
✽✽ Vuê, a jessi seris su chestis cuistions, tu passis pal taleban furlanist, simpri cuintri Triest. E chest nus puarte a une prime considerazion: par jessi crodûts si à di jessi bausârs, ven a stâi – par podê jessi considerâts – si scuen fâ finte di nuie, lâ daûr a ce che i sorestants, ma purtrop no dome lôr, a àn voie di fânus crodi.
✽✽ Po dopo, dutis lis voltis che si cjatìn in dificoltât rispiet a fats concrets, datis, nons, storie, a fasin finte di dâti reson, par scomençâ di gnûf, la dì dopo, il lôr zuc di spandi ledan fra la int.
✽✽ Vêso fat cas che al nestri articul su la cuistion de Universitât furlane dal mês passât nol vedi rispuindût nissun di chei che o vin clamâts traditôrs dal popul furlan? No lu àno let? Dificil, viodût cemût che al è stât tornât a cjapâ de stampe locâl. A proposit: il diretôr dal Messaggero Veneto, Omar Monastier, tal so blog, al notave une sorte di “viamence” tes espressions.
✽✽ E je vere. O disarai di plui: simpri pocje, e forsit masse tart. E, dut câs, a son peraulis devant di azions scomençadis di tant timp e che a van indenant cun fuarce e violence istituzionâl.
✽✽ Scomençadis di trop? Dopo de vuere, al dîs cualchidun; cu la unitât di Italie, al va plui indaûr cualchidun altri; cun Vignesie, al zonte un altri ancjemò. Dut câs, cuant che o cjalìn indaûr, o cjatìn simpri cualchidun che al à decidût ce fâ tal nestri puest.
✽✽ Ma a voltâsi indaûr masse al ven il stracol: cjalìn duncje indenant, savint che un moment grivi come chest al pues jessi une ocasion par viodi lis robis in maniere diferente.
Di sigûr, cu la aspirine proponude dal guvier talian – e ancje di chel regjonâl – no si va di nissune bande. Si rive forsit a taponâ cualchi buse, dut câs pronte a vierzisi te prossime ocasion.
Di ce bande cjapâle, duncje, se no di chê di viodi ce che o savìn fa miôr, e duncje la part che nus tocje tant che popul jenfri la storie.
✽✽ Alc o vin di proponi.
– Une vision di tolerance e di pâs, di vision alte e spirituâl de vite, ecumeniche, cressude dentri lis nestris lidrîs aquileiesis, confuartade dal Patriarcjât: no son visions nostalgjichis dal passât, ma segments tal Dna di un popul, di front a un mont che al somee jessi dominât dal consumisim.
– Une tradizion moderne di rapuarts sociâi, segnade de lungje esperience de cooperazion e des organizazions contadinis e operariis, catolichis e socialistis. Un rapuart tra lis classis, segnât di un interclassisim fuart.
– Un sens dal lavôr e dal dovê, cumbinât cu la solidarietât.
✽✽ In tancj inteletuâi a àn criticât propit cheste muse: par lôr, a jerin ducj fats cuintri il progrès.
E lu stin viodint, il lôr progrès.
In dì di vuê, mi somee che invezit propit chest stamp nus permetarès di pensâ a un disvilup diviers e positîf.
Metudis dongje, chestis fatis di popul a son une risorse incredibile. Tradusilis in concretece al è un compit de politiche ma cheste e fâs finte di nuie, buine dome di ripeti simpri la stesse solfe: papavuacs, apont. ❚
Dree Valcic