EDITORIÂL – La int e je strache dai partîts, ma scombatìn la malfidence

Al sarà stât un parcè che di chestis elezions i partîts no fevelavin plui di tant, cuasi che a fossin une robe secondarie e fastidiose. O crôt! A vevin pôre di cjatâsi di front a ce che pardabon al è sucedût. La int e je lade a votâ une vore di mancul, ancje se o savìn che lis aministrativis a son plui dongje ai interès de int e viodi cui che al sarà il sindic dal paîs al pues ancje dâ un sburt in plui par lâ a votâ.
Il Friûl, ta chest “zîr” chi, al à vinçude la maie colôr di rose: la int e je strache di peraulis, no si fide plui di nissun, nancje di chel dongje cjase che si presente in liste. Si domande parcè che si met in mostre, e viodût che la politiche e je dute une porcarie e si fâs dome i siei interès, e pense che daûr al à di jessi sigûr cualchi vantaç personâl e di bêçs.
Cheste maniere di rasonâ e je un ben e un mâl tal stes timp.
Tal prin câs e mostre la distance tra un popul e i partîts, tal secont e puarte a une sfiducie plene tal podê gambiâ la situazion. Cussì al è simpri cualchidun pront a sberlâ che “si à di fâ la rivoluzion”, ma a son chei che po dopo si tirin indaûr par prins, cence contâ che lis rivoluzions no son un gustâ di gale, ma a puartin dolôrs e faturis.
O crôt che pai furlaniscj nol sedi avonde par cjapâ note di cheste situazion: par noaltris al pues ancje someâ che se e cres la fote pai partîts, a son simpri partîts talians che a pierdin la fiducie de int. Ma stin atents che se invezit la malfidence e cres tai confronts de politiche, intinudude tant che aministrazion dal ben comun, ancje noaltris o sin dal gjat.
Eh sì, parcè che la nestre propueste sul doman dal Friûl no pues jessi ni dome storiche o culturâl, ma di chestis fondis al à di cjapâ fuarce un progjet di autoguvier. E ce isal di plui politic, di rivoluzionari che cheste prospetive?
Al sarès di fevelâ di cualchi sfuarç di puartâ la acuile furlane ancje tes schedis di chestis elezions.
Rispiet pes sieltis, ma ancje la onestât di ricognossi che il risultât al è stât une vore deludent. No si à di fermâsi par chest, ma scomençâ a pensâ a lis regjonâls de prossime Primavere.
Dificil, cualchidun al dîs impussibil: viodêso altris stradis che no sedin dome chê di fâsi incjantâ di cualchi gri talianot? ■
Dree Valcic