Sfuei Mensîl Furlan Indipendent
Archivi de Patrie

EDITORIÂL – Indevant cu la nestre muse, cence simiotâ

............


O sierìn un altri an, e ce an. Dificil, ruspiôs, e soredut no savìn ancjemò dulà che al larà a bati. No je dome cuestion di un guvier o di chel altri, ancje se al à la sô impuartance, ma soredut o vin di cirî di capî dulà che o lin noaltris furlans, daspò il taramot de crisi.
A voli, si podarès cjapâ l’editoriâl dal an passât e copiâlu in chest numar: i problemis a son restâts chei di prime, dome che cul timp a son lâts ancjemò piês. Ancje la int e scomence a jessi strache, viodint cemût che a van lis robis. Si fevelave di resistence, ma e je dure ancje chê, cuant che no si viôt une prospetive gjenerâl.
Tal stes timp, une novitât positive nus confuarte: tai ultins mês la voie di cjatâsi, di tornâ a fevelâ des lidrîs, de storie furlane, e je tornade a fâsi sintî. Un esempli: la partecipazion di tante int aes seradis metudis adun dal grup di “Furlans di doman”, o la presentazion dal nestri gjornâl a Migjee, in colaborazion cun chel piçul Comun che al difint la sô scuele e la marilenghe e, notizie di pôcs dîs, i risultâts dal scandai comissionât de ARLeF che al conferme che il furlan al è fevelât e capît in largje part regjon e che la int e riten just difindi la nestre lenghe.
Gotis, al disarà come simpri cualchidun, ma a son chês che tal timp a sbusin lis monts.
Cheste nestre convinzion e je plui fuarte di simpri, propit parcè che a son moments dificoltôs dulà che la int, il popul, si inacuarç che dut chel che al è stât, al pues no jessi plui.
A è un zûc dulà che al naufragât si domande cuâi che a son i libris di puartâ cun se, di salvâ. Cussì, il furlan di vuê, sbalotât tes ondis de burascjade, al à di decidi cuâi che a son i valôrs di meti in bande.
Famee, leam cu la tiere, salacor il so jessi laboriôs, la sô onestat di fonde, e vie indenant? Di sigûr, ma a son e a restin peraulis, se no vegnin puartadis te realtât.
Si podaressin paragonâ a chei talents de parabule, che cualchidun al sotere e cualchidun al dopre. E par restâ tal profetic, parcè no scomencìno a domandâsi se pardabon la ricjece che il Signôr nus à regalât di ereditât storiche, di maravee de nature dal paîs dulà che o sin nassûts e o vivìn, dal Friûl in sumis, o vin sielzût di tignîle dome par nô o se al è rivât il moment di spandile ator.
Mostrâ la muse, lu vin scrit adore sul gjornâl, vê il coragjo e la braure di confrontâ la nestre identitât, il nestri jessi popul, cu la sfide dal presint.
Cu la cussience che no dut ce che al passe vuê sot il titul di modernitât al vûl dî progrès: che no si scuen simiotâ par lâ indenant, anzit.
Une disfide ca si preparin a frontà ancjemò une volte cun voaltris, letôrs e fradis. Bon Nadâl e bon An.
DREE VALCIC

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +