EDITORIÂL – Ad ôr di chel flum clamât Friûl

Tal Vanzeli al è scrit che i talents non van metûts sot tiere, ma doprâts. Par me la parabule e vûl dî che lis esperiencis maturadis no puedin restâ un patrimoni personâl, ma jessi metudis a disposizions di chei altris. Cun chest spirt duncje, e ancje cuntun tic di ingropament, o disnici la esperience di diretôr de Patrie.
O cjati un giornâl bielon e di chest si scuen dî grazie al lavôr di Venier e di dute la schirie di colaboradôrs che a àn permetût a lis ideis di deventâ un progjet vîf, vivarôs e soredut origjinâl intai contignûts e te sô vieste grafiche.
Al diseve pre Toni che i someave di viodi il soreli cuant, pôcs agns indaûr, chest groput di zovins si son tirâts dongje a la redazion. Al veve reson. O disarai di plui, di gjornalist di tancj agns, o crôt che al sedi in chest moment sotstimât il prodot rispiet al marcjât.
Ma la “Patrie” no pues jessi considerade un prodot. Un siôr mi à fermât chê altre sere e mi à dite: «Cjale che il giornâl – e si riferive al nestri – al è une bandiere».
Vê une bandiere a cualchidun al podarà someâ forsit retoric e fûr dal timp, a cualchidun altri al pues fâ pôre, viodint come che i simbui a puedin deventâ pericolôs se doprâts par semenâ divisions e tristerie.
No, par noaltris chê acuile e sta par lis tantis musis, lis storiis di ognidun che po dopo a deventin il mosaic di un popul.
Ma par no fâsi cjapâ dentri des peraulis, pensìn pluitost a cemût difindi chê bandiere tal concret. Fin dal timp dal so fondadôr, la Patrie dal Friûl si è movude pe lenghe furlane, par mostrâ la sô dignitât, tal jessi parone di ogni argoment. Tai agns e je lade indenant sul troi de difese dai dirits dai plui debui: cul riferiment a Glesie Furlane e à tignût ferme la ereditât di Aquilee, mari no dome pai credents.
I becjârs di Bertrant in dì di vuê a àn forsit gambiât non e divise, ma a son simpri li, pronts sul flum, su la sô rive drete e su chê çampe.
La maniere doprade par ribaltâ la crisi economiche sui dirits e sul mont furlan e je denant di ducj: preparìnsi a timps di stente che cun cualchi scuse a podaran trasformâsi intun atac gjenerâl no dome a lis condizions di vite, ma soredut a la idee stesse di Friûl.
Ma ancje nô o sin in rive a chel flum, cul vuestri jutori e sperant in chel di Diu.
Dree Valcic