Economie lineâr e circolâr: cuale ise miôr?

La economie, oltri a jessi un argagn seri, e je ancje un afâr complès.
◆ Il model economic plui cognossût si clame lineâr e si fonde, in struc, su la incressite cence padin. Si riferìs ae jeve continuade des risorsis cul fin di lavorâlis par produsi bens di consum. Dit cussì, nuie di mâl. Se nol fos che ce che al reste dai consums al ven butât vie come che al è tant che refudum, cence une selezion di ce che si podarès lâ indenant a doprâ. Cjacarant ae buine: “doprâ e butâ vie”. Tant par dî, une tace di plastiche e dure nome il timp di gloti un cluc di aghe.
◆ Cetantis materiis primis e energjie straçadis par chest! E dut chel incuinament tal ambient par une tace sole! Cun dut achel, la vite curte dai bens nus puarte a comprâ di un continui. Lis materiis a van simpri in mancul, i lôr presits a cressin, la necessitât di smaltî a sglavin e sglonfe i coscj. Une spirâl cence recuie!
Dut chest par dî che la economie lineâr si è mostrade falimentâr.
◆ Tignìn iniment dabon che i consums mondiâi e continuin a lâ sù. Chei che a son i Paîs in disvilup, cussì clamâts pal nivel bas di progrès economic e sociâl, a àn però ducj i dirits di miorâ lis lôr cundizions di vite.
◆ Il progrès dal gjenar uman al passe dal superâ fam e miserie. In plui, in dì di vuê, il consumisim al caraterize il mont. Si che duncje, al è meritori par ducj cirî di vê cualchi bêç te sachete e spindilu sedi pes robis di prime necessitât che par comprâ il soreplui. Pecjât che chest puartament al è dispès sconfondût cul disvilup de cundizion umane.
Cun di fat, cressite e disvilup a son un grum diferents. Il lôr valôr al à pês e consecuencis diferentis te economie gjenerâl e, voie o no voie, su ducj i abitants dal mont.
◆ Le cressite e je cuantitative. Numars, po. E ten di cont dal PIS (Prodot Interni Sporc) che al misure, an par an, l’util di un Stât.
Si trate de ricjece che ven de produzion di bens e servizis cu la zonte dai invistiments e des esportazions, gjavadis lis importazions. Plui o mancul, une musine li che il Stât al met i bêçs vuadagnâts.
◆ Il disvilup al è invezit cualitatîf. Al tocje il miorament dal vivi sociâl, culturâl e politic dai popui.
Capide la diference, nol sarâ dificil intindisi sul secont model economic, che si clame economie circolâr.
◆ In sostance, si trate di doprâ lis risorsis naturâls al minim e mantignî il valôr di chês bielzà dopradis: dâ gnove vite cul ricicli e ridusi la straçarie, come ce che al sucêt in nature. Nuie si cree, nuie si distrûç e dut si trasforme. No je une detule dai nonos: al contrari, al è un principi sientific. Pensìn ae vite stesse su la Tiere: tra chei che a mangjin e chei che a son mangjâts, dut al cambie di un continui intun cercli che nol à fin.
◆ Cun di plui, e je la ocasion par cjatâ fûr lavôrs gnûfs e di cambiâ in miôr pes impresis. L’incuinament al cale e l’ambient al devente plui vivibil. Scarts e refudums a tornin a jessi materiis primis che a jentrin intun gnûf cicli produtîf. Ben al sarès che za la progjetazion dai prodots ju fasès durâ di plui. Cuant che alc si romp, al sarès miôr rivâ a comedâlu. Pe spese, puartâsi daûr la sporte di tele o di rêt. Stratignîsi dal comprâ robe imbalade. E vie indenant cun dutis lis convenzions che, plui o mancul e tal nestri piçul, si cîr di meti in pratiche ogni dì. Ancje parcè che si sin inacuarts de urgjence di fâlu.
Al reste però un fat. Se di une bande al è facil capî che i refudums organics a puedin deventâ “compost” par coltâ il teren (plui o mancul il nestri “ledan”), o che la plastiche riciclade si pues destinâ a materiâl di costruzion o zûcs pai fruts, di chê altre, e cuant che si tocje la proprietât, al è plui complicât cambiâ la mentalitât.
◆ Val a dî che un altri grant principi di chest model di economie al è chel di condividi, impen di comprâ. Bens e servizis a vegnin metûts in comun o scambiâts. Si va dal cjoli in prestit il trapin par meti sù lis scansiis, al fitâ la machine par un viaç o par bisugne. Baratâ oris di lavôr: jo o ven i dopomisdîs a cjase tô par une setemane par tignîti il frut, e tu tu mi netis la nape.
◆ Noaltris furlans lu vin simpri clamât “judâsi”, ma al pues stâi che lu vin dismenteât.
E chi si fermìn. A peraulis, cualchi diference dai doi modei le vin capide. Cumò bisugne dâ gas ai compuartaments virtuôs. Il cambiament nol ven jù dal cîl e nissun si salve di bessôl. ❚