Sfuei Mensîl Furlan Indipendent
Archivi de Patrie

«E volarès une Assemblee dai cristians. Tant che intal 1977»

............

PRE CLAUDIO COMO, IL PREDI FURLAN CHE AL À STÂT DA CJÂF AES PAROCHIIS EUROPEANIS

Verticisim e rûl dai laics a son i ponts debii de riforme dai laics a son i ponts debii de riforme

«Il titul di cheste riforme e podarès jessi “Sante scugne”: ce che no si è fat fin cumò par amôr, si lu fâs par fuarce par vie dal invecjament dal clericât, de mobilitât aumentade des personis, e soredut de scristianizazion dal Friûl»: pre Claudio Como, 76 agns, al è cetant titulât a fevelâ di chescj temis. Di là de sô ativitât pastorâl intense in Friûl (inte parochie udinese di Sant Roc, dopo a Trep Grant intal periodi dal taramot, duncje a Buri e cumò intes dôs popolosis parochiis udinesis di Sant Quarin e dal Redentôr), dal 2001 al 2009, par 8 agns, al è stât president continentâl dal Colocui European des parochiis, un moviment eclesiâl che al met a confront sacerdots e laics di diviersis nazions europeanis par rifleti su la muse de parochie dal XXI secul.

__

Pre Claudio, la parochie coventie ancjemò al Friûl di vuê? E cheste riforme pardabon judie un rilanç?

«La parochie in chescj decenis e à pierdût pês politic, ma e à conservade une grande rilevance sociâl, ancje se intun periodi caraterizât de pierdite di rilevance de fede. E je necessarie une svolte storiche, un tornâ a altris epochis là che lis plêfs a fasevin di centri propulsôr de Glesie. Chest al vâl pal Friûl, pe Italie e pe Europe. Duncje, cheste riforme e cjape un aspiet reâl. L’element plui criticabil al è che e pâr une ristruturazion aziendâl, fate par lâ indevant a esisti cemût che si è. Ma la Glesie no je une aziende, e no si varès di preocupâ di se. E je un strument, no un fin, pe difusion de Buine notizie, dal Vanzeli. La parochie dal XXI secul e à di tornâ a deventâ (e se lu fâs metintsi in comunion cu lis parochiis dongje ancjemò miôr…) missionarie, no spietâ, ma lâ incuintri, no sunâ lis cjampanis, ma sunâ i campanei des cjasis».

__

La riforme des colaborazions pastorâls e fâs sieltis di fonts netis (par esempli la missionarietât e il no abandonâ lis piçulis parochiis…), ma dopo no ufrìs une vision pastorâl, orientaments concrets par rivâ a chescj obietîfs, demandant dal dut la individuazion al teritori. Cualchidun le descrîf tant che une curnîs cence cuadri…

«Pe grande varietât di situazions presintis in Friûl, dal sigûr al jere dificil lâ sul concret, ancje se cierts principis a laressin esplicitâts. La Glesie svuizare, par esempli, e à introdot elements di dirigjisim centrâl, tant savi e lizêr, cuintribelançât di une valorizazion fuarte dal locâl, di dutis lis iniziativis che a vegnin de base. Se e je stime mutuâl e colaborazion dal centri cu la base, al sarà pussibil cjatâ rispuestis buinis intai diviers senaris».

__

Però, intal câs de arcidiocesi di Udin, la valorizazion dai laics in cheste riforme e pâr une semplice enunziazion…

«Chest al è stât segnalât di tancj, e ancje des mês comunitâts, inte riflession che i sin stâts clamâts sul prin stampon di chest document. Il batiât, propit parcè che al è batiât, in teorie, al è sacerdot, re e profete, ma formis reâls di ministerialitât laicâl a fasin fadie a vignî sù par vie des incrostazions indurantis di clericalisim. In cualchi piçule comunitât, la figure dal “referent pastorâl” proponude di mons. Brollo e esist za, vivude tant che pericul che e puedi deventâ autoreferente o che e vadi par cont so. Al va cambiât il cjâf dai predis, ma ancje il mût di fâ dai laics. In cualchi cjamp là che a vegnin sù personis competentis, buinis di relazion, plenis di fede e di onestât, si impon il ricognossiment uficiâl in cualchi forme (une incarghe, une mission, un compit specific…). Ogni batiât al varès di cjapânt cussience… al sarà impussibil che ducj lu fasin, ma cualchidun lu cjaparà sul seri. O pensi soredut intes piçulis comunitâts, chês plui significativis, che a van valorizadis: se no cjalarìn plui i numars, lis presincis aes processions e aes cunvignis, ma o cjalarìn la sostance dal jessi cristians, si podarìn inacuarzi de grande fuarce sociâl des piçulis parochiis».

__

Cualchi predi al à domandât al Arcivescul un coinvolziment plui ampli di dutis lis componentis dal popul di Diu (dal clericât ai laics) intune Assemblee dai cristians. Ce pensial?

«Dal coinvolziment reâl su cheste riforme o doi un judizi negatîf. Nol è stât fat un percors sinodâl. Cirî di rimedeâ ae fin, cemût che si è daûr a fâ, mi somee irilevant se no di efiet contrari. Des vôs che mi son rivadis, la propueste di une Assemblee dai cristians e je stade judicade de Curie une stupidade, une idee strambe di cualchi sacerdot… Invezit, il stîl de Glesie al à di jessi sinodâl, cemût che al aferme Pape Francesc, sintî ducj i cjâfs e lavorâ insiemi. Intal coment al prin stampon di riforme, i conseis parochiâi di Sant Quarin e dal Redentôr, a sotlineavin ancje cemût che il procedi a tapis sfuarçadis e a scjadincis svicinadis al somee negatîf. Un percors di puartade epocâl tant che chel des colaborazions pastorâls al domande gradualitât, sperimentazion, verifiche, valorizazion di cetant che al è za di positîf in at».

__

E dopo, inte diocesi di Udin al è il precedent di une Assemblee dai cristians cetant impuartante come chê dal 1977…

«Pensant ai timps dramatics dal taramot e de lote pe Universitât dal Friûl, e jere dal sigûr tante confusion, ma ancje une grande voie di partecipazion, di fâ sintî la proprie vôs. La Assemblee dai cristians e sarès stade ancje vuê une ocasion otime par cjapâ componentis amplis de comunitât eclesiâl (no dome i conseis pastorâi). Ancje parcè che la gjenesi de riforme e je stade verticistiche, pûr diluide intes clapis dai sacerdots e intai conseis episcopâi». ❚

di Roberto Pensa

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +