E torne a nassi la Pro Carnia, une associazion cun lidrîs antighispar promovi resonaments su la Cjargne dal futûr

“Un lûc di discussion, al di fûr e a flanc des istituzions e dai partîts de zone, par torna a pensâ e a imbastî la Cjargne di doman”. Al è chest l’obietîf che si da un grup di veterans de politiche e de aministrazion cjargnele, impegnâts in chestis setemanis a costituî la “Pro Carnia 2000”, une associazion che si ispire a chê che al veve inmaneât tai agns Trente dal secul passât il senatôr Michele Gortani.
Leint i nons dai promotôrs – D’Avolio, Carpenedo, Piutti, Magrini, Lepre, Missana, Cortolezzis, Larice – si pues intuî bielzà che la vecje vuardie no intint molâ il vues e e cîr di ritaiâsi un spazi par podê dî ancjemò la sô. “Il dibatit politic, economic e sociâl in chest teritori tai ultins agns al è sparît – al spieghe il professôr D’Avolio, rapresentant storic de çampe in Cjargne e di pôc jessût fûr dal Partît Democratic locâl – e po dopo il percors di sburt metût adun de Comunitât montane dai agns ’70 ai agns ’90 si è planc a planc distudât. Tal stes timp, si à pierdude une grande part dal pês politic de Cjargne tai confronts dal rest de Regjon. La nestre idee e je chê di tirâ dongje lis miôr inteligjencis de nestre tiere e cun lôr provâ a sburtâ i resonaments viers lis risorsis che o vin in man: la green economy, il bosc, lis energjiis rinovabilis, la informatiche, il turisim sostignibil. Cuistions fondamentâls pal disvilup economic de mont che tal stes timp e à di lavorâ par rindi i servizis simpri plui di prossimitât, in maniere di no fâ scjampâ altre int”. Par partî, il grup al à pensât di promovi trê cunvignis tal mês di Jugn: un su lis gnovis tecnologjiis, un sul bosc e un su pe energjie. Starìn a viodi se a saltaran lusignis o se a saran lis solitis peraulis. ❚
D.Z.