E DUCJ A VIVERIN… FURLANS E CONTENTS. La liende di barbe Nadâl

Al jere une volte (e al è ancjemò), in Laponie, un om vecjo mîl e plui agns.
Al veve une barbe blancje e un vistît ros e si clamave Barbe Nadâl. Al jere un om magjic, bon di fâ robis che nissun altri al saveve fâ. Ma soredut, al jere un om furlan, e si lu capìs di un grum di robis.
Barbe Nadâl al è di fat un piçul imprenditôr, che al gjestìs une scuadre di dipendents, clamâts “elfs”. La liende no lu conferme, ma cualchidun al dîs che la imprese di Barbe Nadâl e jere nassude in Friûl, e che i elfs a sedin in realtât i sbilfs de Cjargne.
Ma une dì, stuf di paiâ masse tassis a Rome, Barbe Nadâl al è emigrât, berlant “O Zico, o Laponie!”.
La furlanetât di Barbe Nadâl e je confermade ancje di altris segns.
Prime di dut, no si spavente devant dal lavôr e, in mancul di un mês, di cuant che i rivin lis letarutis fin ai 25 di Dicembar, al lavore dì e gnot par fâ sù ducj i zuiatui par milions di fruts tal mont.
Al è ancje clâr che i plâs mateâ cul len e cui imprescj par costruî robis, e no si contente di costruîlis: al sta daûr a dute la filiere, fin ae consegne al client finâl, parcè che fasint di bessôi no si sbalie mai.
E fevelìn de consegne. Di brâf furlan, a Barbe Nadâl no i interesse vê il machinon, il status symbol par fâsi viodi plui realizât di chei altris imprenditôrs: no, a lui i va ben ancje une loze (la liende no lu dîs clarementri, ma in origjin al samee che la loze e fos une Ape).
Te gnot tra i 24 e i 25 di Dicembar, Barbe Nadâl al partìs, cun cualsisei timp e  temperadure, e al consegne ai fruts ducj i regâi. Simpri puntuâl. Mai une scuse par no jessi rivât a fâ sù ben un zûc. E cu la umiltât di sporcjâsi di cinise il vistît, che tant no i impuarte di jessi “a la mode” o di fâsi cjalâ, ma dome di finî in timp il lavôr e di fâ lâ indevant la dite.
E, propit in chê gnot, la magjie di Barbe Nadâl e ven fûr plui potente che mai, cuntun misteri mai viodût prime.
La velocitât? No. La capacitât di contentâ e di cognossi ducj i fruts dal mont? No, ancjemò di plui.
A scomençâ de buinore dai 25 di Dicembar, di fat, Barbe Nadâl al polse, cence fâ nuie fin che nol rive il Nadâl dal an che al ven. Ce incjantesim: nissun altri furlan al à mai rivât a trasformâsi in triestin par undis mês ad an! ❚
Lis flabis
di Bete di Spere