“Dôs gardenias par BB” il ricuart di un grant artist che al lotave pe libertât e al cjantave “par fortune che a son i mats”

«O volevin cambiâ il mont cu la poesie, cambiâ la lenghe, fâle nestre, pastrocjâle, doprâle par impiâ temporâi e fâ nassi primulis, par lâ a cagâ e scrivi i nestris zovins agns intun mont che al murive.»
Cussì Lussia Di Uanis, trastolone e artiste impegnade, nus ricuarde un so amì e coleghe, Raffaele BB Lazzara, che l’an passât – te gnot dai 13 di Jugn – nus à lassâts.»
Al jere un poete furlan, visionari, ironic, libertari e scalembri. Cu la sô poesie e musiche al è stât un dai protagoniscj dal rinovament de culture furlane. Tacant cu la riviste anarchiche libertarie “Usmis” e daspò cu la tribù poetiche dai Trastolons.
Par tignî vive la sô vision, te ricorence dal aniversari, ai 15 di Lui, inte suaze de rassegne “Notturni DiVersi” a Puart, si son dâs dongje i siei amîs e compagns di aventure, che cun leturis, imagjins e cjançons che lu fasin rivivi, a àn rindût omaç a un artist poliedric e anarchic, che no si pues dismenteâ.
Come che nus conte Lussia, che insiemi a chei altris Trastolons (Stiefin Morat, Pauli Cantarut, Vera Putelli), e à organizade la manifestazion, «o vin dedicât tantis seradis a Raff e tantis personis nus àn clamât a memoreâlu. Tra chescj, a “Notturni Diversi” e ae “Fieste de Viarte” a Cormons. Lis seradis lis vin clamadis “Dôs gardenias par BB”.»
«Chest non lu à cjapât Stiefin Morat di une cjançon di Gardel “Dos gardenias para ti”, il sunadôr tanghero argjentin. Cuant che a son nassûts i Trastolons, intun viaç a Ortisei par un cunvigne te comunitât ladine, o jerin in machine jo, Morat e Lazzara. Dut il viaç o vin scoltât Gardel, e lis gardeniis par BB a rivin di li.» Cualchi foto di chel viaç si pues cjatâ in chest video che al è stât realizât di Lussia: https://youtu.be/Tr7VuDjWQkw.
Ae serade a jerin presints i Trastolons acompagnâts di Romano Todesco e Ermes “Momi” Ghirardini, che cun Guido Carrara, te Bande Tzingare a àn sunât dilunc dal event. Guido al jere un grant amì di Raff e al veve cun lui une lungje colaborazion artistiche. Nol podeve mancjâ Fabian Riz, amì, vicin di cjase e furnidôr di blanc di Raff. A jerin presints ancje I Rive no Tocje, che pûr no jessint Trastolons, tai ultins agns si son svicinâts a di chei, e che a lavin dispès a cjatâ Lazzara. Loris Vescul, che cun Raff al à realizât tal 2007 l’album “Verba Manent”, nol à rivât a jessi presint ae serade, ma al è vignût di Bologne Mino Specolizzi, amì di Raff dai timps de universitât e origjinari de Pulie.
«Jo o ai tancj biei ricuarts cun lui», nus conte Lussia. «Cuant che al è vignût a stâ in Friûl e o jerin zovins e biei (normâl no?), o stavin a Monfalcon ducj i doi, e dopo jessisi cjatâts pe prime volte a un incuintri di “Usmis”, une sere lu ai invidât ca di me a condividi un tai dal butilion di blanc dal Zobresc di Uanis (la vigne di gno pari) par fâsi une cjacarade. Chê sere il butilion lu vin bevût dut ,e tor cuatri di matine o ai tirât fûr lis mês poesiis. Lui lis à tant preseadis.»
Cun chest biel ricuart, us invidìn a lâ te pagjine https://raffbblazzara.wordpress.com/, metude in pîts dal fradi di Raff. Si puedin cjatâ tantis imagjins, videos, poesiis e cjançons dal artist, cussì che cul so ricuart e la sô art si puedi continuâ a scombati pe libertât di ognidun.
✒ Moira Pezzetta