LA REPLICHE DAL PRESIDENT DE ASSEMBLEE DE CLIF NAVARRIA AL ASSESSÔR ROBERTI
La Regjon e varès vût di introdusi za dal 1964 lis competencis linguistichis intai concors publics
«La uniche discriminazion che o viôt za in opare e je chê viers dai furlans che a volaressin indreçâsi ai uficis publics inte lôr lenghe e dispès no puedin fâlu o a cjatin cualchidun che al dîs “parli in italiano perché qui siamo in Italia»: Diego Navarria, sindic di Cjarlins e president de Assemblee de Comunitât linguistiche furlane i rispuint cussì al assessôr Roberti, «che forsit, jessint triestin, nol rive a capî la grande impuartance di chest probleme», al evidenzie.
«In Friûl-Vignesie Julie a son ricognossudis 4 lenghis: di là dal talian, a son il furlan, il sloven e il todesc. Il Statût regjonâl al articul 3 al fevele di paritât di dirits di tratament di ducj i citadins, cence tignî cont dal grup linguistic di apartignince. Chest al compuarte che al à di jessi garantît ancje l’ûs public de lenghe. L’articul 4 dal Statût al met tra lis competencis primariis de nestre Regjon autonome speciâl ancje l’ordenament dai uficis dai ents dipendents de Regjon, e ancje il stât juridic e economic dal personâl che al è sot di chei. Duncje, fevelant di compart unic che al regole l’incuadrament di ducj i dipendents de Regjon e dai ents locâi, la Regjon e varès podût e vût di introdusi za dal 1964 lis competencis linguistichis intai concors publics. Chest al è deventât ancjemò plui dovût dopo de aprovazion de leç 482/99».
—
Cemût aplicâ chest principi?
«E va doprade dal sigûr une gradualitât. O partìn di zero e no podìn pretindi daurman chel che al sucêt par esempli pe lenghe slovene, che la sô cognossince e je impressindibile pe assunzion intai comuns dulà che e je insediade chê minorance. Jo o stimi juste cheste domande di cognossince de lenghe slovene, ma ancjetant al va sigurât ae comunitât furlane. Domandâ e aplicâ par intîr chest standard al podarès jessi traumatic. Une soluzion e podarès jessi garantî une cuote, ancje basse tant che il 10-20% dai puescj metûts a concors, che i vegni domandade la competence linguistiche par furlan, par garantî il dirit di cjatâ in ogni articolazion de Regjon e dai ents locâi cualchidun che al puedi rispuindi sedi a vôs che par iscrit in lenghe furlane». ❚
di Roberto Pensa
