“D’incjant, l’incjant” Il cine des flabis

Sbilfs e aganis, orcui e Benandants a son creaturis magjichis, che a vegnin fûr da râr, tal mieç dai boscs o al clâr di lune, e a fasin part dal patrimoni cetant siôr di mîts e di leiendis de regjon. Un patrimoni che l’Istitût pe ricercje e la promozion de civiltât furlane “Achille Tellini” di Manzan al torne a scuvierzi e a fâ cognossi midiant de cineprese. Il risultât? Un concors e une rassegne di curtmetraçs, il Festival bienâl internazionâl “D’incjant, l’incjant”, unics tal lôr gjenar in Italie, che a àn tant che telâr lis flabis e lis crodincis popolârs dal Friûl, ma ancje dal rest da la Italie e da la Europe. Par promovi la gnove edizion, il “Tellini” – che le inmanee – al à invidât in regjon, sabide ai 19 e domenie ai 20 di Zenâr, gjornaliscj e operadôrs dal setôr cinematografic di Alpe Adria e ju à puartâts a Cividât, e tai cjistiei di Darcjan, Colorêt di Montalban e Vilalte, a scuvierzi lûcs siôrs di storie e custodis di leiendis e contis fantastichis. Unichis. Parcè che il Friûl “pe sô colocazion gjeografiche e pe sô storie, al à vût contats cun cetantis culturis e al à vivût tun curizûl di civiltâts e savês diferents”, al spieghe il diretôr artistic de manifestazion, Guido Sut. “Lis nestris contis a son particolârs, propit parcè che a tegnin dentri dut il bagai di nozions, esperiencis e espressions di altris culturis”.
Dal 1992 – di cuant che al è nassût -, l’Istitût “Tellini” al puarte indevant, te suaze di un progjet di ricercje articolât, une impuartante opare di scandai, tutele e valorizazion di mîts, flabis e leiendis dal Friûl-Vignesie Julie, che e à puartât a une golaine di 12 volums (il decim tierç al è in stampe) preseade ancje fûr regjon. Di cualchi an incà, al à decidût di confrontâsi cun culturis, tradizions e rapresentazions dal imagjinari popolâr di altris regjons di Italie e di Europe e di proponilis al public, cul voli de cineprese. Al à cussì ideât e inmaneât il concors di curtmetraçs che al è rivât chest an ae tierce edizion. A son ametudis oparis di no plui di 30 minûts di durade, di cualsisei gjenar e tecniche (de fiction ae animazion, al documentari) e lenghe (ancje chês minorizadis, baste che a sedin i sottitui par talian), che a vedin par teme i mîts, lis flabis e lis leiendis di regjons e Paîs talians e dal forest. Si pues iscrivisi fin ai 31 di Mai dal 2013. Lis oparis selezionadis di une jurie di esperts a vignaran presentadis al public tal mês di Otubar che al ven, dilunc dal Festival “D’incjant, l’incjant”, che al viodarà ancje la premiazion dai curts miôr.
Al concors, fin cumò, a àn partecipât regjiscj e videomakers di dute Italie e dal forest (43 lis voris presentadis tal 2011, 19 tal 2009), cun storiis di cualitât sul teme dal fantastic, che a àn lis lôr lidrîs tal imagjinari popolâr o che a nassin de creativitât dai autôrs. “In gracie dai curtmetraçs rivâts al concors – al dîs Sut -, o vin viodût che il pinsîr imagjinatîf, la leiende, la conte fantastiche a son ancjemò vîfs e bogns di produsi, cun formis espressivis e tecnologjiis modernis, oparis di art che a incantesemin”.