Il sindic di Udin Fontanini al rilance il progjet, che al à viodûts tancj faliments e delusions
No si stufarìn mai di ricuardâlu: la identitât di un popul si misure de sô culture, de storie, des tradizions e ancje de lenghe, che e je la anime e il cûr dal nestri mût di pensâ, di resonâ e di vivi, cemût che al diseve pre Antoni Beline, che lis sôs peraulis a bechin tal vîf inmò in dì di vuê. Bisugne duncje jessi braurôs di doprâ il furlan, parcè che al da colôr e calôr ae nestre maniere di jessi e al merte di jessi doprât in ducj i cjamps de cuotidianitât, no dome cui amîs e in famee, ma ancje tes istituzions e tai contescj publics, stant che, cemût che al berlave chel che al fo un dai diretôrs plui sintûts e amâts (ma ancje scombatûts) dal nestri sfuei, «la lenghe e je pal popul ce che e je la aghe pal pes. Gjavant la aghe al mûr; cambiant la aghe al cambie savôr».
Chest pinsîr nol pues no cjatâ bonstâ soredut tal mont artistic, indulà che il prodot finâl (tal nestri câs il libri, la cjançon o il spetacul) al dipent in maniere strente di une riflession interiôr che si intint di comunicâ. Cemût rivâ adore a esprimi se stes se no si è libars di fâlu te forme che nus sarès plui naturâl?
Intune ete globalizade, indulà che la culture di masse e je daûr a cjapâ simpri plui pît, talpassant e crevant chês che a son lis specificitâts e lis specialitâts, al è pardabon dificil di restâ inlidrisâts tal propri fondâl, cence riscjâ di jessi menâts vie de curint de omologazion e cence che cheste e spandi lis sôs sostancis intosseantis che a puartin a une assuefazion totâl. Purpûr, tal mieç di dut chest nivelament, e je ancjemò cualchi sperance, cemût che e testemonee la cualitât des creaturis (e no si pues dineâ che pal autôr il risultât di une creazion artistiche al è tant che un part) nassudis tai ultins agns tal contest furlan. De narative, indulà che il mont dal fogolâr e dal Friûl contadin al à lassât il puest a senaris gnûfs, cul gust di inventâ e di sperimentâ gjenars e stîi diferents, ae musiche, li che la vilote (che bisugnarès studiâle di plui, ancje a scuele, invezit di fermâsi a chês cuatri pivetadis stonadis cul pifar) e je stade riscuvierte e miscliçade cun melodiis di altris culturis, lant a cirî, tal stes timp, di zuiâ cu la lenghe, doprantle ancje par fâ rap e rock, cence dut câs dismenteâsi dal test, che cualchi volte al rive a espressions poetichis une vore altis.
E sul palc, invezit, si sintial il rivoc de vôs furlane? Cjalant il setôr amatoriâl, si podarès rispuindi di sì cence çancis, viodudis lis tantis compagniis diletantis che cun impegn e passion a puartin ator i lôr spetacui, cun grant sucès e agradiment dal public, folcjât dentri di teatruts di paîs, salis parochiâls o ancje sot dai tendons di sagre. Il plui des voltis, però, il repertori al è “brilant”, cun pontis di comicitât che no si lassin scjampâ cualchi volgaritât o cualchi strambolot, che par sigûr a fasin ridi di plui, ma che forsit no son cussì necessariis pe comprension de storie e pal valôr de opare. Se si volte il voli plui adalt, lant a cirî chei che a son i professioniscj, si viodarà che, gjavât il Teatri Incerto, grup che in scuasit cuarante agns al à concuistât ducj i cjantons dal Friûl e no dome, nol esist sù par jù nissun altri atôr che al recite di regule in lenghe furlane. Sigûr, ator si pues cjatâ plui di cualchi spetacul fat par furlan e interpretât di int che lu fâs par mistîr (il stes Fabiano Fantini, Massimo Somaglino, Aida Talliente, alc dal Molino Rosenkranz, dal Teatro della Sete o dal Teatrino del Rifo, tant par fâ dome cualchi non), ma par solit a son progjets peâts a cualchi finanziament, o ben tentatîfs ardimentôs di “resistence” che, no cate la cualitât fûr di discussion, si fermin daspò di une o dôs replichis, parcè che no cjatin nissun supuart o forme di distribuzion.
Forsit, chest vueit si podarès jemplâlu cu la creazion di un Teatri stabil furlan, une cuistion frontade plui voltis in passât tai nestris numars e che cumò e je tornade fûr tes liniis programatichis dal gnûf sindic di Udin, Pieri Fontanini, che al intint cence fal di puartâ indenant chê che e je deventade une bataie di vite par Bepi Agostinis.
Al è ancjemò masse adore par capî se e cemût che cheste propueste e larà indenant, dut câs, al sarès di tignî il troi ben batût, stant che chest progjet, che al à viodûts tancj faliments e delusions, al è in spiete di plui di trente agns. Ocjo che a spietâ masse che i timps a sedin madûrs, si va a risi che a ledin fraits. ❚
Serena Fogolini