Dai prins di Mai Là di Moret al à il menù in lenghe furlane

L’hotel e ristorant Là di Moret di viâl Tresesin al è un dai plui innomenâts dal Friûl (intal 2005 al à fat 100 agns). La part pe ristorazion e je fate di Fogolâr Là di Moret, che al è il ristorant storic, un pont di riferiment de cusine furlane che al à vinçût tancj premis e segnalât des vuidis talianis plui impuartantis. Dongje di chel, al è il plui inovatîf L’Insolito Moret li de verande dal ambient. Il concet di cusine al è in leam strent cul teritori, dutune cun inovazion e contaminazion. Ma chest leam no si ferme al mangjâ: di resint, la part da L’insolito e je stade rinovade e tra lis novitâts al è il menù, che a partî dai prins di Mai al è ancje scrit par furlan. Dut fat di lôr iniziative, cence domandâ bêçs a istituzions publichis. La motivazion nus e spieghe il chef Stefano Basello, di Maian. «Parcè par furlan? Ma parcè che o sin furlans, po!» mi rispuint decîs «La nestre filosofie di cusine e je di leam cul teritori, e duncje al à di dimostrâlu ancje il nestri menù: cu la pratiche, cence tantis cjacaris. Cun di plui, in timps come chescj che no si cjate plui tant il furlan tai ristorants». Il risultât al è che «La int lu viôt e e reste sorprindude e contente a viodi la nestre lenghe dongje di talian, inglês e todesc». Nuie di miôr di un menù in lenghe furlane par fâ viodi cun concretece che il mangjâ al è furlan, duncje! Brâfs chei da L’Insolito Moret e a ‘nt spietìn altris…
Il menù (une cerce)
Introdusûts dal sproc «No podìn jessi plui sans di ce che o mangjìn; vivi daûr nature, parcè che o sin nature» ve ca une sielte di doi plats par ogni puartade, scrits cussì come che nus àn passât chei di Là di Moret. Par savê chei altris… lait a viodi di persone
APERITÎFS DI MANGJÂ
Frico 2.0
Creme di selino râf, rafioi di nolis
CRÛTS
Gjambarons di Grau marinâts cun grignei di senape e balsamic
Taiade di brancin cun creme di formadi caprin e cops di mandule
FORMADI E ROBE PURCINE
Cerce di formadis di lat di vacje de Cjargne – Malghe Alte Cjargne
Cerce di formadis di lat di cjavre di Taipane – aziende agricule Zore
I formadis a son compagnâts di pomis, mîl e confeture
I NESTRIS VÂS
Poleç, patatis e osmarin
Mignestron scomponût
PANINS
Baguette, persut crût S. Denêl Prolongo 18 mês
Baguette, cevole rosse di Cjavàs, trute fîl di fum, Montâs e butui di lidrichesse
DE CUSINE
Taiade di Manç
Poleç impanât cun Patatis
I DOLÇS
Crepes di pomulutis di bosc
L’Aur di Cividât
L’Insolito Moret, ristorantut in verande. Si pues stâ sui 20 euros ancje cul bevi. Sierât sabide e domenie a misdì. ❚