La mostre permanente des creazions
di un marangon artist e je curade dal nevôt
che al puarte il so stes non
La vite contadine che fin cualchi deceni indaûr e caraterizave cetant la nestre regjon e somee che e sedi simpri plui lontane dal nestri ricuart e de cuotidianitât di vuê, basade su tantis plui comoditâts, servizis e tecnologjiis.
◆ La art e la creativitât a àn però il grant podê di ripuartâ in vite – almancul in maniere figurative – cualchi element dal passât: al è il câs des oparis creadis di Carlo Beltrame, sorenomenât “Carlin”, che par plui o mancul trente agns al à lavorât cence padin ae ricostruzion minuziose dal so paîs di origjin, Frisanc, te vecje provincie di Pordenon.
◆ “Carlin”, nassût intal 1912 e muart a 99 agns intal 2022, al à passât dute la sô vite a Frisanc (fûr che cualchi stagjon di vore tal forest): di mistîr al à fat il marangon, e une volte rivât ae etât de pension al à scomençât a dedicâsi, sul imprin cuasi par zûc, ae realizazion des sôs miniaturis, servintsi dome di imprescj e struments che di simpri al doprave pal so mistîr.
◆ Cul timp, lis oparis a àn scomençât a deventâ simpri di plui, tant che l’artist al à pensât di partecipâ a une esposizion artistiche fate tal paîs intal mês di Avost: La esposizion al public dai siei lavôrs e à otignût tant sucès che il sindic stes al à proponût di assegnâ a mostre permanente il spazi de ex latarie di Frisanc. E je tacade cussì, intal 2006, la storie de mostre “Da Lis Mans di Carlin”.
◆ Lis miniaturis straordenariis, che “Carlin” al à fat dal dut in autonomie e a man, a riprodusin cun fedeltât assolude i edificis tradizionâi e carateristics di Frisanc (lis cjasis, il mulin, la glesie…), cussì come che lui sai visave dai timps de sô infanzie: sedi il difûr che il dentri di ogni edifici a son inricjîts di riproduzions di mobilie, ogjets di vite cuotidiane, soremobii, imprescj di vore, e tant altri. Dut riprodusût in maniere cetant precise e realistiche.
◆ Ancje i materiâi doprâts a corispuindin a chei che a costituivin l’ogjet reâl che l’artist si ispire: par esempli, lis diviersis parts di piere des miniaturis a son fatis di piere arenarie, un gjenar di piere autoctone doprade pardabon pes costruzions in paîs.
I materiâi plui doprâts inte creazion des miniaturis a son diviers gjenars di len (massime cjastinâr), la piere arenarie e il fier batût.
◆ Vuê la mostre e je gjestide dal unic nevôt dal artist e so omonim, Carlo Beltrame, che o vin intervistât: “Par me al è un grues impegn ma ancje un grant onôr puartâ indenant il lavôr fat di gno nono, che al jere un om dal caratar fuart, che al à vivût cun grande energjie e passion dute la sô vite, propit fin te ultime dì”, al declare Carlo Beltrame. “La mostre “Da Lis Mans di Carlin” e rapresente intal detai cemût che tal passât la piçule comunitât di Frisanc e fos autonome ad implen, stant che ducj i bens che a coventavin pe sussistence (mangjative, riscjaldament, vistîts, imprescj, materiâi bogns par varis setôrs di lavôr) a vignivin produsûts tal paîs dai stes abitants, cence nissune dibisugne di “poiâsi” a aiûts esternis. Vuê la comunitât e je cence dubi plui evolude, ma ancje plui fragjile, parcè che e je une interdipendence fuarte tra lûcs che a son tant lontans – ancje di un pont di viste fisic – tra di lôr.
◆ Par gno cont, la mostre no je dome un spazi dulà amirâ i risultâts cetant biei dal so talent, ma al è ancje un strument didatic preziôs: a son di fat une vore i scuelârs (pal plui des scuelis mediis e superiôrs) che nus fasin visite, e ogni volte o ai il plasê di viodi trop che i arlêfs si incuriosissin in maniere spontanie e cemût che mi fasin tantis domandis suntune vite contadine che lôr no cognossin e che e riscje, cul passâ dal timp, di vignî purtrop dismenteade.
◆ Jo o cjati che, par tant che studiâ la nestre storie sui libris di scuele al sedi alc di bon, al è forsit ancjemò miôr e plui apassionant mostrâur chestis oparis, di mût che a puedin constatâ in concret cui lôr voi cuâi che a podevin jessi i valôrs e lis fondis di chestis vecjis gjenerazions”.
◆ La mostre “Da Lis Mans di Carlin”, in place Pognici n. 5 a Frisanc, si pues visitâ dutis lis domeniis des 16.00 aes 19: lis miniaturis a son tal plan sot de mostre, intant che tal plan parsore a son stâts metûts in esposizion diviers ogjets doprâts pardabon tal passât (imprescj, ogjetistiche di aventari, e v.i.), donâts di un anzian dal puest, e che a dan ancje la oportunitât ai visitadôrs di fâ un confront tra l’ogjet reâl e sô riproduzion in miniature. ❚
