CURTIS E CHE SI TOCJIN – Une Universitât plui furlane

Il Comitât pe autonomie e pal rilanç dal Friûl al è daûr a lavorâ par che si metin adun, jenfri Setembar, i rapresentants de Universitât furlane, dai Comuns e des Provinciis, dai Sindacâts dai lavoradôrs, des Associazions des impresis e de culture, cul fin di strenzi un Pat progjetuâl che al rilanci e che al rignuvissi lis resons fondativis de nestre Universitât, al servizi de Patrie dal Friûl interie. Cheste iniziative e je di grant valôr par vie che e vûl rispuindi in maniere unitarie e corâl, di une bande al tentatîf dal Guvier di Rome di scjafoiâ il nestri Ateneu cul fâi mancjâ i finanziaments indispensabii pe sô vite e pal so disvilup e, di chê altre, al tentatîf di ambients triestins e di cualchi esponent de Zonte regjonâl di aprofitâ de situazion par sostignî la esigjence di tornâ a une sole Universitât regjonâl. Fasint fûr cussì la autonomie e la identitât de Universitât furlane, volude cun tantis bataiis dal Friûl intîr, dal so popul e dal preseât impegn de Glesie furlane. Chest che o disìn al è cetant vêr parcè che l’articul 26 de leç 546/1977, che le à istituide, al dîs in maniere plui che clare che chest Ateneu “al à di contribuî al progrès civîl, sociâl e ae rinassince economiche dal Friûl e che al à di deventâ strument organic di disvilup e di rignuviment dai filons origjinâi de culture, de lenghe, des tradizions e de storie dal Friûl”.
Duncje, propit par nissune reson cheste Universitât no pues jessi ni soprimude ni limitade te sô autonomie cu lis prepotencis e i palets fissâts di Triest e di Rome. In chescj trente agns di vite, l’Ateneu furlan al à dimostrât vitalitât cualificade tant cu la sô presince fisiche – no dome a Udin ma ancje a Gurize e Pordenon e inaltrò in Friûl -, tant cul grant numar di students che lu àn preferît, come pûr pes tantis ecelencis concuistadis a nivel talian. E, o zontìn ancjemò, pal impegn che al à dimostrât pe inovazion industriâl e agricule des nestris impresis e pe cualificazion identitarie e linguistiche dai nestris docents e, duncje, dai zovins di dutis lis scuelis furlanis.
O pensìn che il Pat che si scrivarà tra Universitât e rapresentancis di dute la societât furlane, cul preseât consei de Glesie furlane, al siervarà di sigûr a rignuvî e a lâ indentri cui leams de societât di chenti e la sô Universitât. Par fâle deventâ simpri di plui un laboratori grant e indispensabil di ideis e di progjets pal Friûl di vuê e di doman.
Curtis e che si tocjin, inalore. Di front a chest moviment popolâr e di Istituzions de Patrie, a Rome e a Triest pensarano ancjemò di contrastâ e di distudâ, cence paiâ dazi, la grande volontât dai furlans di cressi e di lâ indenant?
ARNALT BARACÊT