I furlans a àn di jessi simpri in vuaite par difindi e par rinfuartî i lôr dirits costituzionâi e europeans, la lôr lenghe, la identitât e la unitât dal Friûl intîr, dal Timau ae Livence. Il nestri sfuei “La Patrie dal Friûl” al è une testemoneance di dut chest. E vuê, alc o scrivarìn su la bataie ancjemò in vore par difindi e par valorizâ la autonomie e la identitât de Universitât furlane.
Come che o savês, cualchi mês indaûr la cuistion e je nassude cui tais dai finanziaments dal Stât al intîr sisteme universitari talian, ma in particolâr aes Universitâts plui zovinis, come chê di Udin. Invezit di trai su lis straçariis dentri e fûr des Universitâts, il Guvier si è metût a taiâ fuart pardut, ancje te ricercje, te inovazion, te formazion specializade dai zovins. Di dut chest, une schirie di esponents triestins su “Il Piccolo” e altrò, a àn profitât par scomençâ a fâ bordel cuintri la Universitât autonome di Udin sostignint, come trente e passe agns indaûr, che intune regjon piçule come la nestre, a è avonde une Universitât (cul voli simpri a chê di Triest) o che si à di meti in pîts nome une Fondazion pes Universitâts di Udin e di Triest. Cul fin di cjapâ sù bêçs di impresis e di istituzions che a varessin di jessi, daspò, dispensâts ai Ateneus di bande de Regjon. Cussì i bêçs di impresis furlanis a laressin ancjemò une volte a Triest…
Di front a chest assalt ae Universitât dal Friûl, par iniziative dal prof. Gian Franco D’Aronco, President dal Comitât pe autonomie e il rilanç dal Friûl, plui di trente Istituzions eletivis e associazions economichis, sociâls, culturâls furlanis si son metudis adun e a àn firmât, il 27 Otubar passât, un Pat cu la Universitât dal Friûl, là che si puarte indenant l’impen di ducj par rinfuartî la autonomie e la identitât furlane dal nestri Ateneu. Par fâ cressi simpri, tal interès dal popul furlan e de sô zoventût, la sô funzion in Friûl, cu lis regjons confinantis e in Europe.
Chest Pat pe Universitât dal Friûl al è une Cjarte storiche, come storiche e reste la racuelte di 125 mil firmis di furlans, tal 1976, par fâ meti sù dal Stât talian – come che al è po dopo sucedût – l’Ateneu di Udin. Il Stât talian, il Guvier e il Parlament di vuê, e cussì la Regjon, a àn di ricrodisi che cheste Universitât no va scjafoiade, ma e va invezit judade e pupilade par che e puarti indenant i obietîfs fissâts par jê de leç istitutive. Di jessi, purpûr, strument pal disvilup economic e sociâl dal Friûl e pal rinovament, pe incressite de lenghe e de culture dal popul furlan.
Chestis finalitâts a àn di jessi capidis a Triest di cualchi esponent de Zonte regjonâl, e ancje di Gurize e di Pordenon che a spessein simpri a predicjâ, invezit, di meti adun un sisteme unic universitari e che tra lis Universitâts di Triest e di Udin no à di esisti colaborazion e competizion, par continuâ cussì a fâ regâi a chei che no si impegnin te ricercje, te inovazion tecnologjiche cu lis impresis e tal disvilup dai rapuarts internazionâi.
Curtis e che si tocjin, inalore. Nô no si dismenteìn des resistencis ativis e passivis che tai timps passâts si son manifestadis sui grancj obietîfs de furlanetât di bande di plui di cualchi furlan, sei di Udin, che di Gurize che di Pordenon. Cussì come in chês voltis, l’impuartant par vinci in cheste bataie al è che la part fondamentâl dai furlans e sedi cussiente de sô identitât di popul e che no moli.
ARNALT BARACÊT
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +
Sport… che ti trai! / Pietro Corredig e Sonia Borghese: une vite di pignatis a scufiots
servizis di Francesco Tonizzo
La cubie dai cjanalots, un di San Pieri e une di Miers, e à vinçût il campionât talian di machinis storichis e il titul european, simpri cun Sanremo intal destin Inzen, passion, amôr, dedizion, voie di zirâ il mont, spirt competitîf, leam cun il teritori des Vals dal Nadison, e risultâts une vore preseâts. Il […] lei di plui +
L’EDITORIÂL / La identitât e ven dai zovins
Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +