A fuarce di vitis alc si môf

Sburte, messede, dati di fâ, ten unît il front e a la fin, salacor, tu passis. Cussì, almancul al somee a proposit de leç pal furlan tes scuelis. Cheste leç forsit no sarà une remenade de nestre int e de sô dignitât di popul. Tai fats ce isal sucedût ? Al è sucedût che il President de Zonte regjonâl, Illy, rispuindint ai 15 di Lui sul “Messaggero Veneto – Giornale del Friuli” ae letare vierte dal prof. Zuanfranc D’Aronco, president dal Comitât pe autonomie e il rilanç dal Friûl, al à acetât di gambiâ la leç regjonâl a proposit de jentrade dal furlan tes scuelis. Tant che al domandave D’Aronco, Illy al à dit di jessi dacuardi che i gjenitôrs dai arlêfs no vedin di scrivi ogni an domandis pal insegnament dal furlan a scuele e par doprâlu sicu imprest di insegnament di storie, matematiche, gjeografie e v.i., come adun di altris lenghis forestis. Tes scuelis dai Comuns che a àn bielzà domandât di vê la tutele de nestre lenghe, proviodude de leç statâl 482 dal 1999, l’insegnament dal furlan al à di jessi obligatori par ducj i arlêfs, gjavât chel che al podarà domandâ di jessi esonerât. Cussì a vevin proponût i doi grops di savis nomenâts de stesse Zonte regjonâl e de Arlef e cun lôr ducj i furlaniscj e i rapresentants des istituzions furlanis clamâts a Triest a dî la lôr ae Comission dal Consei regjonâl impegnade a meti jù la leç. Lu vevin pretindût parcè che dome cussì la scuele e la Universitât a puedin imbastî in maniere serie i programs scolastics e la formazion dai mestris e dai professôrs che a varan il compit di puartâ indenant la marilenghe tes scuelis. Ma parcè che, prime di dut, bisugne rispietâ la dignitât dal popul furlan. Ai siei fîs, tai fats, no si pues domandâ ogni an se a son furlans e se a vuelin il furlan a scuele!! Ce che o domandìn al è un dirit nestri naturâl, civîl, costituzionâl talian, difindût ancje de Union europeane. Ma ancjemò no podìn cjantâ vitorie. Bisugne che in chestis prossimis setemanis ducj i furlans a stedin in vuaite parcè che, scomençant di Illy, i partîts e i lôr rapresentants in Consei regjonâl no gambiin ancjemò une volte bandiere ma a sepin rispietâ i dirits linguistics dal popul furlan, tant che chel sloven e dai todescs dal alt Friûl. Chest lu viodarìn in concret cuant che, prime in Comission e po dopo in assemblee dal Consei regjonâl e vignarà fate buine la leç di pueste. Se o vinçarin no varìn vût un plasê dai sorestans. E varà vint la nestre lungje bataie pe lenghe, pe culture e la identitât dal popul furlan! E sperìn che daspò di cheste, altris grandis puestis a sedin a puartade di man. Chê de Rai par furlan e chê de costituzion uficiâl de Assemblee des Provincis furlanis, o Comunitât dal Friûl che, al di là dal non che e metarà finalmentri di gnûf adun un Friûl, vuê sparniçât, sotan e debul, par fâlu plui fuart e cussient dal so grant passât, dal sô avignî e de sô capacitât di autoguviêr.