CULTURE – Premiât il mangjâ furlan

Siet agns indaûr Luca Merlino (34 agns) e Paolo Genuzio (40 agns) a cjapavin sù la gjestion in rive Bartolini a Udin di chel che al jere stât prin di lôr il bar “Udinese Caffè” e inmò prime il “Gemma Bar”.
Vuê Pieri Mortadele” al è un dai ponts di riferiments dal mangjâ furlan” e ancje la Cjamare di Cumierç e à volût ricognossi cheste imprese tant che une dai prins 40 ambients che a àn ricevude la targhe volude chest an.
“O proponìn ai nestris clients i prodots tipics dal Friûl” nus spieghe Luca Merlino “ma ancje il nestri spirt furlan, la nestre identitât: nol è un câs che o vedin sielt un non furlan pe nestre ostarie”.
Cun convinzion nus conte che volê doprâ la lenghe furlane ancje par presentâ la lôr ativitât ju à premiâts “Cuant che o vin tacât o jerin zovins e o cirivin un non adat par inviâ la ativitât: Pieri Mortadele” al jere za jentrât tes orelis de int, stant che dal 1961 vecjo paron si clamave Pieri (Chiandussi, ndr) e al veve metude une grande mortadele sul banc: la int aromai e jere usade a doprâ chest non” al continue “Noaltris lu vin uficializât” e chest al è stât preseât dai nestris clients e nus à permetût di incressi la nestre visibilitât parcè che une insegne par furlan e jere une biele novitât”.
Ma nol è dut. Di fat cheste sensibilitât ju à premiâts dôs voltis”. Simpri Luca Merlino nus confide “La nestre no je la uniche targhe che e je stade consegnade, ma e je la prime: la Cjamare di Cumierç e à sielt di scomençâ cun noaltris e ancje chi la motivazion e je leade a la lenghe furlane” al continue “Il President Giovanni Da Pozzo al veve sot man la liste dai ambients ricognossûts e ju steve passant un par un: un biel moment si ferme e al domande Cui sono chescj de Sperìn ben srl”?”. Cun sodisfazion Luca Merlino nus conferme “Chest al è il non che o vin sielt pe reson sociâl de nestre dite e grazie a chest o vin stiçade la atenzion dal President de Cjamare di Cumierç che al à volût fâ la prime consegne cun noaltris”.
Christian Romanini