CULTURE – Platimi, Fîl & Fiâr

Timp indaûr, cuant che la musiche si le scoltave ancjemò dal vinîl, un disc nol jere dome un supuart sonôr, ma ben un ogjet di cjalâ e tocjâ, fintremai une opare di art in cierts câs. Cu la rivade dai CD la situazion e je cambiade, nol esist cuasi plui chel incjant leât al ogjet in se. Ogni tant però si cjate cualchi ecezion, e chest al il câs di Platimi l’ultin CD dai Fîl e Fiâr, produsût de etichete Musiche Furlane Fuarte: un box di carton che al ten dentri, sore al cd, un libri di poesiis di Massimo Govetto.
Il lavôr, di fat, al nas de colaborazion jenfri il grup e il poete furlan. Une misture perfete di rock e poesie che si disvilupe tai nûf tocs dal CD. Cjançons e poesiis si alternin in maniere ecuilibrade, la man che e à scrit ducj i tescj e je simpri chê di Govetto e, di fat, ancje il cjantât al è poesie in musiche. La vôs di Moira Misson e interprete i tescj cun caratar e grande personalitât, supuartade dal rock grintôs di Erik Canciani, Marco Pletti e Mirco Tondon. Di Platimi, il toc che al da il non al CD, a Oltri passant par Uarbe e Monfalcon, il disc si lu scoltarès dut intun flât, tant il ritmi al cjape e al coinvolç. Tal mieç però, a ripuartânus ae calme e ae riflession lis poesiis Je, No sai, Intôr, Tornimi il cumò e Bastimi, ognidune recitade di vôs diferentis. E ce vôs! Si scomence cun Monica Aguzzi e si finìs cun Claudio Moretti, ma tal mieç a son Luca Zalateu, Fabiano Fantini e Tiziana Perini.
Un lavôr complet, che al emozione e divertìs, e che di fat tal 2009 al à vinçût la targhe Deganutti come miôr produzion dal an.
Une uniche note e somee stonade: scritis e ringraciaments ducj par talian, un pecjât par un CD in marilenghe.
FEDERICA ANGELI