Mi ven di ridi!

Presentât pe prime volte a Dimponç ai 24 di Mai di chest an e daspò ai 14 di Jugn tal agriturisim “Là di Gabri” a Cjaurià (www.agriturismogabry.it) e cumò ad Avost in turné par dut il Friìul, il secont libri di barzaletis di Romeo Patatti, o ben il balonîr de Cjargne. 150 pagjinis di contis e “sflocjis” ambientadis te sô (ma ancje nestre) biele Cjargne, cun protagoniscj i vêrs personaçs des monts, cui lôr valôrs e i lôr difiets. Cussì o cjatìn il “cjoc convint”, l’imancjabil carabinîr, il putanîr impenitent, lis discussions tra coparis, il dut insiorât da lis ambientazions in tiere cjargnele e furlane.
Inte biele presentazion di pre Antoni Beline e je sierade dute le essence di chest libri, scrit di un om sempliç e solâr, che cu la sô voie di vivi al vûl rindi plui legre e lizere la vite. Propite pre Toni lu definìs “une persone biele, splendide, benedete” e al proseguìs sostignint che “lis ridadis che Romeo al fâs fâ ai siei scoltadôrs o letôrs a partissin prime di dut de simpatie e de pâs e de contentece che lui al trasmet di dute la sô persone”. Un libri duncje fat prin di dut di une persone che e crôt cun fuarce tal efiet terapeutic di une biele ridade, une sorte di at scaramantic viers il mont mat e malât dal dì di vuê. Di fat come che al dîs Romeo te sô introduzion “i miedis modernis a disin che une ridade ti slungje la vite e a je come une midisine…achì o vês come midisine 100 dosis di lei un pôc in dì”.
Duncje un libri che al rive tal intent no facil di fâ ridi, cuant che plui facil al è fâsi ridi!