CULTURE – La ultime fadie in «ligrie»

A doi agns dal so ultin lavôr «Baruc» Lino Straulino al torne cuntun gnûf cd simpri prodot de Nota di Valter Colle. «L’Alegrie», chest il titul dal disc, al è il tribût di Lino a la musiche tradizionâl furlane, une sô passion di simpri. Lis 12 vilotis rielaboradis dal «Cont di Sudri» a son sunadis in clâf country/blues cuntune operazion in part simile a chê de version di «La biele stele» publicade intal cd «Straulino-Fedele-Vescovo» dal 2008.
Inte sô produzion Straulino al à mostrât plui voltis il so interès pe rileture de musiche tradizionâl, come par esempli cul so cjaval di bataie «Fasìn un cjant a la cjargnele» o cu lis sôs versions di «Ninine mê» (2000) e «Done Mari» (1994).
Cheste volte il riclam al mont dal country american al è une vore plui marcât ancje par vie de presince di une strumentazion plui variade e dal ûs impuartant dal banjo dongje de ghitare acustiche.
Straulino al zuie cun inteligjence, afiet e ironie cu lis vilotis che al à sielzût e al cjate un mût di proponilis diferent dal origjinâl ma che al  permet a cui che al scolte di ricognossilis e di sintîlis sôs.
Cussì in cualchi câs al cambie la tonalitât e la linie melodiche come inte version di «O ce biel cjistiel a Udin» o inte titletrack «L’Alegrie». In cualchi altri al cambie la part ritmiche come par esempi intal câs di «In chê dì da las mês gnoços» che e devente un 2/4 country rispiet al ¾ origjinâl. O pûr si divertìs a modificâ la armonizazion come inte version pardabon divertente di «Al è rot il cjalderuç» o inte delicade «Niçulaile».
Il risultât al è un disc divertent e convincent che al sa cumbinâ l’afiet cu la ironie, la citazion cu la rielaborazion. Di ducj i tocs di chest cd mi permet in particolâr di segnalâus une version a gno parê pardabon biele di «Niçulaile» dulà che la gnove armonizazion in minôr e l’ûs savint e misurât de strumentazion al esalte la biele melodie origjinâl de ninenane e nus puarte intune atmosfere di sium e di magjie.
Il rest o podarês scuvierzilu di bessôi scoltant il gnûf lavôr di Lino Straulino e magari dant un cuc al sô profîl MySpace (www.myspace.com/linostraulino) dulà che e je publicade une piçule cerce dal so ultin disc.
Matieu Fogale