CULTURE – La Regjon e “distude” Onde Furlane

Di bot 90mil euros di mancul. Cun cheste gnove al è scomençât il 2011 par Radio Onde Furlane, la storiche emitente che di 30 agns in ca e lavore ogni dì a pro de lenghe e de culture furlanis. No coventin presentazions: ROF e fâs comunicazion radiofoniche pe plui part in lenghe furlane ma, pai pôcs che no lu san, e prodûs ancje struments linguistic tant che il dizionari e il coretôr informatic; progjets pe scuele (come “Radio dîs”), pe musiche (il Premi Friûl e la etichete Musiche Furlane Fuarte) e pe emigrazion furlane (pensìn a “Sgarfefurlans”). «Progjets pensâts par une azion continuative, che se tu ju fermis al è come butâju vie», al à dit Pauli Cantarut, president di Informazion Furlane. I tais de Regjon aes emitentis privadis pai programs radiotelevisîfs in lenghe furlane a son une manarie che e pese sù par jù par un cuart dal belanç de cooperative.
IL PRETEST DE “CRISI”_ «La crisi economiche e je la scuse juste par platâ il totâl disinterès che la maiorance politiche regjonâl e à mostrât viers lis lenghis propriis», al comente Cantarut, «tacant dal president Renzo Tondo, che al à dit che “il friulano non è una priorità”. Un esempli: un tai indiferenziât in percentuâl compagne, indipendentementri de cuantitât e cualitât de produzion par furlan. Une sielte fate par no movi pucis».
RADIO COMUNITARIE_ E provâ a bati ai privâts? «No mi pâr che lis grandis impresis furlanis a vedin dimostrât fin cumò grande sensibilitât pal ûs de lenghe», al continue, «se si pense che lis primis grandis campagnis publicitariis che a doprin il furlan in Friûl lis àn fatis lis multinazionâls. Cun di plui che, jessint nô di fat une radio comunitarie, o vin precîs limits di presince di publicitât e oblics di autoprodusi la plui part dal palinsest». La redazion dut câs no je stade cu lis mans in man e si je inventade “Viva Onde Furlane”, un conciert di autofinanziament lât benon, graciis al supuart di tantis personis e al jutori dai grups musicâi dal teritori. Par judâ la radio a sorevivi si pues ancje fâ une donazion tal cont che si cjate tal sît (www.ondefurlane.eu).
CONSECUENCIS PESANTIS_ Ma infin, ce volaressial dî fâ di mancul di Onde Furlane? «Al vûl dî fâ di mancul di une vôs indipendente, par esempli dai grancj grups editoriâi», al dîs inmò il president de cooperative, «e fâ di mancul di une ativitât multiforme che e à stiçât e contât dal di dentri la culture furlane dai ultins 30 agns come pocjis altris realtâts. O pensi che la sô esistence e la sô autonomie a rapresentin un valôr par dute la comunitât regjonâl e a varessin di sei difindudis di ducj, ancje di chei che no simpri a son dacuardi cun ce che a sintin su lis nestris frecuencis».
Natascia Gargano