CULTURE – LA FABRICHE DAI… LIBRIS. Un bon Sant Simon

Franco Marchetta, cu la opare “Cronichis di Saveri Sengar”, al à vinçût la 32me edizion dal Premi leterari “Sant Simon” di Codroip dedicât a Agnul di Spere. La jurie e à ancje segnalât il lavôr “Re Ricart in Friûl” di Gianluca Franco. Carlo Tolazzi, president dai judiçs, al à fevelât di sensazions contrastantis vudis inte edizion di chest an. Se di une bande si è vût un numar une vore bas di oparis presentadis, dome sîs, cun di plui scuasit dutis rivadis tal ultin moment, tant di vê vût pôre di no podê lâ indenant cul concors par mancjance di oparis, di chê altre la cualitât e lis impostazions dai lavôrs presentâts a son stadis une vore buinis. «E je stade di sigûr la miôr edizion dai ultins agns» al à continuât Tolazzi, «tant che, almancul uns trê des oparis presentadis a varessin podût vinci intai concors dai ultins agns».
Tant par ribati il clime gnûf di chest colp, si è marcât che la partecipazion feminine e je stade buine, cun cuatri scritoris, e cun di plui, dutis lis oparis a mostravin di vê une storie di contâ rivant a jemplâ in maniere no artificiose, lis pagjinis di une conte lungje.
Il motîf che al à puartât la jurie a individuâ lis dôs oparis sieltis al è stât la capacitât di svicinâsi a une dimension plui grande dal Friûl tradizionâl, confrontantsi cun altris fenomens e altris leteraturis.
La leture fate, intune sale de premiazion plene e atente, di cualchi pagjine de opare vincidore e à someât dâ fuarce a chest judizi.
In sumis, no dismenteant la cuestion de basse partecipazion, che e varà di stiçâ riflessions atentis, si pues dî che cheste volte la cualitât no je mancjade. Se po o zontìn che dopo un pâr di agns, si à tornât a inmaneâ il premi Sant Simonut pes scuelis, che al à vût une buine partecipazion, si pues dî che di Codroip chest an si cjale ae leterature furlane cuntun fregul in plui di otimisim.
Maurizio Biasizzo