CULTURE – La fabriche dai… libris. Il cancar de monoculture

Il 150esim aniversari de proclamazion de unitât de Italie al pues jessi une buine ocasion par cualchi riflession sul rapuart fra culture e politiche linguistiche che si à doprade ta chest paîs. Ce che al è sucedût si sa: si è atuade une imposizion de lenghe taliane in sostituzion des feveladis e dai dialets locâi cuntune demonizazion, tant che bas, volgâr e inferiôr di dut ce che nol jere talian.
LIS AZIONS DILUNC DAI AGNS_ Si è planificade une costruzion di une lenghe sierade a lis contaminazions regjonâls. Si son fatis ancje robis teribilis come tai periodis che si trasferivin i mestris al di fûr des lôr regjons par che no podedin fevelâ il dialet dai fruts fin a rivâ aes misuris de ete fassiste.
Te realtât i scritôrs e i inteletuâi a àn vût opinions difarentis su chestis cuestions, se Manzoni al leve a lavâ “i panni in Arno”, il sicilian Verga, tant par fâ un esempli, al doprave une lenghe une vore plui imbastardide e regjonâl. A jerin la pussibilitât e i struments par cjapâ stradis difarentis, ma cussì nol è stât.
TATICHE POLITICHE_ La retoriche di chescj dîs e somee vê tirât fûr lis posizions plui reazionariis, scuasit che a fossin naturâls. Di fonde e je une vore di tatiche politiche cuintri de Leghe Nord, ma il risultât al è che si finìs cul dâ cuintri ai dirits des minorancis tant che il furlan.
Si reste pensant a cetancj inteletuâi, personis inteligjentis, pussibii candidâts al premi Nobel, simpri pronts a lotâ e manifestâ pai dirits dal “Dulaisestàn”, no son bogns di spindi une peraule pai dirits des minorancis che a son dentri de Italie.
Une part di cheste incapacitât e derive propit de politiche linguistiche doprade de unitât in ca che e je jentrade te subcussience coletive tant che un cancar. Si trate di une mancjance culturâl, un limit che intune Europe moderne dai dirits al va superât.
Maurizio Biasizzo