CULTURE – IL FRIÛL TAL ETERE. Olimpiadis cence pignate

Cuant che a rivin lis Olimpiadis – e ancjemò di plui chês invernâls – al scate simpri l’orgoi de patrie, un orgoi che al cjape dentri furlans e furlans tal forest. Ancje par un come me, che al viôt i sports, ducj i sports, cul binocul, al rive il moment di plantâ la bandiere de acuile su la terace. Ma ancjemò une volte, ce imprese podê stâ daûr ai nestri campions pe television! Viodi lis falcadis dal trepolan Giorgio Di Centa e de tarvisiane Silvia Rupil, lis marculis dal cirubit Alessandro Pittin, lis zirevoltis de biondissime Boccaccin e je fature: nancje che o coressin cun lôr! E pensâ che o vin mandât a Vancouver ancje il pot pourrì dai nestris microfons furlans, val a dî i coments tecnics di Luciano Zanier di Cjamparòs pe Rai (cressût a pan e Gioia Meloni, su Rai3 Fvg, par tantis domeniis di cetancj agns fa) e di Gabriella Paruzzi di Fusinis par Sky.
Dut câs, ju vin gjoldûts masse pôc par vie che no vevin la pignate (cemût che mê none e clame la parabule) sul cuviert, o il digjitâl.
Par fortune, o sin rivâts adore di parâ par Alessandro Pittin e par un moment o vin sumiât e tornât a vivi i sflandôrs dai Di Centa, cuant che in Cjargne si sunavin lis cjampanis a fieste par un podi: lui sì che al jere “in clâr”, no coventave la pignate. Altri il câs de stafete di schi di font maschîl e il snowboard: par lôr al coventave il benedet argagn! Mi soi organizât cun internet e mi soi colegât a une web tv prime austriache e po polache, par vie che la prime e lave a scats. Il gno personal Luciano Zanier al fevelave muc e no capivi un boro, ma almancul o viodevi la gare.
Vecje polemiche, chê dal servizi public che nol seguìs i sports minôrs. Polemiche che e ven sburtade soredut de int des monts. La Rai, di simpri e à dât impuartance dome ae dissese e al slalom, che a son chei plui popolârs. Dacuardi: nol jere Torin, no si zuiave in cjase, e il cambi di orari nol judave a tignî vierts i voi. Une altre rivoluzion: cu la pignate e il digjitâl, cheste volte si son trasformadis in palanchis ancje chestis piçulis specialitâts, che a tornin in naftaline subit dopo des Olimpiadis, come che a esistessin une volte ogni cuatri agns e vonde. Par viodi dut, bisugne comprâ il pachetut “sport”. E stant che in mont il digjitâl terestri ancjemò nol rive, la uniche soluzion e je la parabule.
Piçule postile: il 2010 al sarès l’an dal switch off pal Friûl – VJ, ven a stâi dal distudâsi complet dal segnâl analogjic, par passâ une volte par simpri al digjitâl terestri. Al sarès, apont. E probabilmentri nol sarà. I bêçs stanziâts de Regjon par judâ lis emitents a fâ il salt a son stâts spostâts par frontâ la crisi economiche e lis nestris emitents no son tecnologjichementri prontis. E cor vôs di un rinvii. Sperìn che lis prossimis olimpiadis no ledin a Van – couver.
JAN TOTI