CULTURE – I prodots dal Autun

I prins frescs autunâls a puartin cun lôr i prodots tipics de stagjon: miluçs, cjastinis, foncs. Ducj prodots carateristics de nestre zone, che a caraterizin ancje la nestre ativitât agricule.
A chest proposit, al sa ben l’assessôr regjonâl aes risorsis rurâls, agroalimentârs e forestâls Claudio Violino, trop che e conte e trop che e je impuartante la fruticulture inte nestre regjon: “O sin tra i miôr produtôrs di pomis, di pierçui e di ducj i prodots de fruticulture. Soredut te planure furlane, o vin une grande produzion di miluçs – al dîs l’assessôr – e il nestri teritori al è puartât par vê produzions di alte cualitât, di varietâts autoctonis buinis e une vore preseadis in Italie e in Europe”.
Par esempli, si pues nomenâ cualchi varietât autoctone di miluç: la zeuka o seuka, tipiche de nestre regjon, cence dismenteâsi che, cul jutori di gnovis ricercjis, a son stadis cjatadis altris varietâts, Renete di Pradis, Rusin di Unvier, Rosse di Cravuazie.
No stin a dismenteâsi che un prodot trasformât, une vore cognossût e che al plâs, al è il struc di miluç, ricognossût tant che tradizionâl in dute la regjon, sempliç inte lavorazion e gustôs di bevi. A chest proposit, ancje chest an a Pantianins (tal comun di Merêt di Tombe) e je stade la Mostre Regjonâl dal Miluç (ae fin di Setembar e la prime fin di setemane di Otubar), che e à decidût lis miôr casselis di miluçs, tant che il miôr asêt e il miôr struc.
Timp di Autun al è ancje timp di cjastinis, di mangjâ cjaldis par scjaldâ i prins frêts di Otubar o di Novembar. Ancje chest prodot, tipichementri autunâl, si pues cjatâ intai nestris boscs, soredut in chei des Valadis dal Nadison, zontantju, al è clâr, a chei dai boscs des nestris monts. E a son tancj i prodots che si puedin confezionâ cu lis cjastinis: marmeladis, purè, dolçs di ogni gjenar. E lis cjastinis pai Sants a son aromai un must, come che a disaressin i inglês!
Cinzia Collini