CULTURE – I asins e il lôr formadi

Intune des tantis valadis dal Friûl al è un puest un pôc taponât e no tant cognossût dai classics circuits turistics che a puartin tante int in visite: il Cjanâl dal Arzin. E chei che a son a stâ lì, ju clàmin asìns. In chês valadis a fasin un formadi une vore particolâr, tant che a Anduins e je la fieste dal formadi asìn. Cemût isal chest formadi? E parcè isal cussì particolâr e diferent di ducj chei altris?
CEMÛT SI FASIAL?_ Il formadi asìn classic al è fat cul lat crût, che al ven dome de zone di produzion, ven a stâi il Cjanâl dal Arzin. Une volte che si è imbastide la forme dal formadi, cheste e ven prime cuete a cirche 45 grâts e daspò e ven metude intune miscele particolâr fate di lat, pan e sâl, che si clame salmuerie. La salmuerie e je une sostance particolâr fate par fâ il formadi e e ven fate invecjâ in contenitôrs di len; man man che al passe il timp i ven zontât dentri sâl, savôrs e gras, ancje chel che al piert il formadi stes.
Il formadi asìn plui morbit invezit, al à une preparazion diferente. Intant nol ven cuet, ancje par vie che il lat al ven pastorizât e no doprât a crût. In cheste maniere la forme e reste plui morbide e cun plui aghe. Il formadi al ven distès metût inte salmuerie e lì al reste 20 dîs.
Il savôr dal formadi asìn al è dât sigûr de salmuerie e dal len lì che al ven tignût: al à un savôr un pôc picant, salât e une consistence plui o mancul fuarte che al sedi morbit o classic.
Lis notiziis che o cjatìn a proposit dal formadi asìn a son tantis e a disin che cheste maniere di fâ il formadi tradizionâl e je une vore vecje. Bielzà in epoche romane e jere cheste variant de preparazion e intal ‘700 a son tantis lis citazions intai documents uficiâi che a confermin la antichitât di chest prodot.
Cinzia Collini