CULTURE – Bande Tzingare Heretica

Al esist un fîl visionari che al ten dongje Friûl e Sudameriche in chest gnûf lavôr di Guido Carrara a non Bande Tzingare.
Come tal precedent «Necal» dentri si cjate dute la ricercje di colôrs, umanitât e amôr puartade indenant aromai di dîs agns in te personâl storie di «emigrazion al contrari» di Carrara, che al à sielt (lu ricuardi ai mancul atents) di trasferîsi in Argjentine daspò di vê savoltât la musiche furlane tai prins agns 90 adun cui Mitili FLK.
Lidrîs, elements simbolics peâts a lis dôs tieris e paesaçs;  cuntune uniche grande diference te impostazion musicâl: se il cd di prime al jere un lavôr vivarôs e insiorât di flâts e percussions,  chest «Heretica»  si presente come un disc rock essenziâl, ruspiôs e militant.
Il cd si vierç cun «Une cadillac par Tito» dulà che «a dute velocitât» a passin devant dai voi lis stradis polvarosis cence fin de Argjentine e il cîl, simpri plui clâr e turchin. Subit dopo «Cjant d’amor pa basse», dulà che lis stradis a son simpri lungjis e desertis ma che a tain par mieç i cjamps di pôi… de basse. Ma no sin devant di un acuarel static  e gnagnôs. Intun moment storic di smariment e puaretât culturâl, dulà che la int si met tes mans dai media e dal diu television (Religion) nol reste altre vie che resisti (Resistensa) imagjinant di «vivi tun mont plui salvadi» (Corint tal soreli). Cence fâ di mancul di une, a tocs amare, ironie («Vonde Cazzadis», forsit il toc plui biel dal cd, dulà che Guido al sbroche in dute le sô teatralitât). Par chel che al inten il lengaç musicâl, come za dit, o sin devant  di un disc rock arût e minimâl, cuntun stamp siguramentri sudamerican, ben pojât su la ritmiche di un inedit Leo Virgili al bas e dal mestri Ermes M. Ghirardini ae batarie. I tescj par furlan, a trats miscliçâts cul castilian e l’inglês, a son insiorâts de presince di diviers poetis che a fasin riferiment al masse adore dismenteât moviment dai Trastolons. Di citâ duncje il contribût poetic/leterari di Lussia di Uanis, Stiefin Morat, Federico Tavan e Raff BB Lazzara (che al cure une biele recension/descrizion presinte dentri il stes cd).
Mojra Bearzot