CULTURE – ART-Â. La anime dal Friûl te art di Giovanni Patat di Dartigne

Al è famôs pai tancj monuments ai muarts in vuere, li che al tradûs su piere il spirt alpin massime te glorie e tal drame de Julia, componente essenziâl de furlanetât. Giovanni Patat si met dentri, duncje, in chel filon di sculture monumentâl e eroiche che al à vût tancj rapresentants in regjon, e al cjarie lis sôs oparis – sentinelis energjichis e alpins boconons – di impegn civîl, tal troi de furlanetât. Si pues ben dî, di fat, che Patat al à dât une forme visibil ae anime dal Friûl. Tes sôs sculturis al pant il leam cu la civiltât contadine, cu la religjositât dal popul, cu lis sôs lidrîs. Significatîf il fat che al sielzi di firmâsi, tant che un mestri de Ete di mieç, marcant il puest di dulà che al ven: Dartigne, dulà che al è nassût e dulà che al vîf e al opere modelant il cuet e lavorant, cun pontis, maçûi e fresis, i claps e la piere, e i “trovants”, i claps cjapats sù tai rivuats, te grave dal Tiliment.
Patat al à lavorât marmul, piere d’Istrie, plasintine, arzile e len par agns, cence tancj ricognossiments uficiâi. La Provincie di Udin e à inmaneât une mostre monografiche (“Giovanni Patat di Dartigne. La piere che e vîf”), te glesie di Sant Antoni a Udin, par contâ il lunc percors artistic dal scultôr furlan, metint adun une setantine di oparis, des primis dai agns Cuarante, cuant che al lavorave ancjemò tal laboratori di Pietro Rizzotti, aes ultimis cuatri fatis di pueste pe esposizion. Cui che nol à viodût la mostre (sierade ai 17 di Lui), che al ciri il catalic (informazions al numar 0432/279440), un bon imprest par svicinâ l’art di Patat, insiorât dal inventari des oparis e di un dvd cuntun documentari fat dal Comun di Dartigne cul contribût de Provincie di Udin.
BIOGRAFIE_ Giovanni Patat al nas ai 8 di Dicembar dal 1928 a Dartigne, di une famee di contadins. Une vore zovin al impare il mistîr li de buteghe dal barbe Pietro Rizzotti, dulà che al reste fin al 1949. Dopo un periodi in Belgjiche, tal 1951 al torne in Friûl e si met in propri te sô cjase di Dartigne. Al passe cun naturalece des oparis di piçul formât, modeladis in arzile e bronç, a chês in scjale monumentâl a caratar civîl e religjôs. La figurazion e prevâl fin al taramot dal 1976, che al segne une cesure tal so lavôr. Cul timp, aes oparis realistichis al met dongje sculturis di caratar astrat, cun plens, vueits e superficiis tormentadis.
Erika Adami