CULTURE – 10 agns de cooperative Serling

Dîs agns indaûr, come ancje vuê, e jere int che e lavorave pe lenghe furlane, ma pe plui part dai câs e jere une ativitât secondarie, che no deve di vivi. «Par chel si sin dâts dongje in cooperative» al spieghe Sandri Carrozzo, president de Serling «par cirî di stabilizâ la situazion lavorative, di vierzi oportunitâts professionâls plui buinis di chês che il marcjât al deve al singul».
LA NASSITE_ Di une bande a son stadis fondamentâls lis primis leçs di tutele e il fat che si tacave une planificazion linguistiche: lis cundizions legjislativis e aministrativis a son stadis la LR15/96, la L. 492/99 e lis ativitâts inviadis dal OLF. Di fat, ancje se la Serling no cjapave finanziaments, aes iniziativis finanziadis dispès ur coventavin servizis professionâi, e duncje a devin prospetivis par une cooperative di servizis linguistics.
«Di un pont di viste culturâl» al continue Carrozzo «O sin un dai efiets di chê corint che e pense ae lenghe furlane e al Friûl in maniere plui libare, costrutive e vierte al gnûf: se cheste corint in Friûl e esist si à di dî graciis prin di dut a Informazion Furlane/Radio Onde Furlane».
I PAS INDEVANT_ Carrozzo nus fâs un struc de ativitât «In dîs agns o vin judât a fâ struments fondamentâi, che prime no si rivave nancje a imagjinâsi: dizionaris digjitâi, un coretôr ortografic, un tradutôr automatic. Si impegnìn ancje in cjamps “tradizionâi” (traduzions, didatiche, editorie…): il lavôr fat in 10 agns al è propit tant».
I PROBLEMIS DI VUÊ_ Par Carrozzo la situazion gjenerâl no je tant buine «Une politiche linguistiche serie e concrete pal furlan inmò no je: leçs e struturis che a varessin di regolâ e di promovi la planificazion no son fatis par funzionâ pardabon, a son sotfinanziadis e dispès blocadis di contradizions». Secont Carrozzo cheste situazion e je parcè che in Italie no je une vere volontât politiche di ricognossi i dirits linguistics «…cuntune man si da ce che si scuen, obleâts de democrazie, cun chê altre si gjave dut ce che si pues, sburtâts de inerzie nazionalistiche o de confusion mentâl».
FUTÛR_ Carrozzo al siere fevelant dal doman «Pal avignî o vin za i fiers in aghe par prodots gnûfs tai setôrs li che o sin in vore: in particolâr programs informatics e editorie».
Mauro Della Schiava