Sfuei Mensîl Furlan Indipendent
Archivi de Patrie

TERITORIS – AUSTRIE. La minorance cravuate tal Burgenland e domande modificazions de gnove leç di tutele

............

Chê che e someave tal prin moment une modifiche de leç di minorance pai slovens carinzians che e vûl sierâ il cantin de segnaletiche mancjante, e je cumò deventade une propueste par une leç che e regolarà la tutele di dutis lis minorancis: ancje chês che a vivin lontan de Carinzie ven a stâi i ongjarês e cravuats tal Burgenland.
Dilunc dal procès des tratativis, i cravuats e chês altris minorancis no son stâts ni invidâts a discuti ni si son metûts tal mieç di cheste discussion, stant che si fevelave simpri di un afâr dome carinzian che si riferìs dome ae segnaletiche mancjante.
Cumò al è deventât clâr che il guvier austriac al vûl une leç plui universâl par doprâle ancje tal Burgenland e a Viene par meti sù gnovis regulis che a rivuardin no dome la segnaletiche, ma ancje l’ûs de lenghe di minorance tant che lenghe uficiâl.
Manifestazion di proteste dai zovins slovens e cravuats a Viene_ I prins a protestâ a vôs alte a son stâts cussì i zovins des comunitâts slovene e cravuate: in prime linie, a jerin i students de organizazion slovene KSŠŠD e di chê cravuate HAK. I zovins a disin che infin l’avignî des minorancis al dipint di lôr, ma a lôr nissun no ur à domandât nuie.
Positive e je stade la cooperazion tra slovens e cravuats, come che za al è sucedût tal passât: lis organizazions dai zovins a vuelin cooperâ e judâsi ancje tal avignî. Ai 15 di Jugn a àn organizât insiemit une manifestazion cuintri de propueste de gnove leç di tutele.
«Cu la modifiche de leç di tutele, la Austrie si rint a un consens todesc-nazionâl», e jere la opinion dai membris de manifestazion tal centri di Viene. “L’articul 7 che al tutele lis minorancis al scuen jessi rispietât”, al jere il slogan principâl.
Slovens e cravuats si presentin unîts_ Daûr dal rapresentant de organizazion cravuate HAK Lukas Kornfeind, la manifestazion e je un segnâl positîf e e mostre che la union e fâs la fuarce. Ancje tal avignî al sarà impuartant che lis minorancis a restin unidis tal difindi i lôr dirits, cussì e à dite ancje la presidente de organizazion dai students slovens a Viene Lara Vouk.
I cravuats a critichin di no jessi coinvolzûts_ Salacor za masse tart, cuant che la modifiche de leç e je za tal parlament te ultime fase, si son sveâts ancje i funzionaris de minorance cravuate. Inte conference stampe dai 8 di Jugn il comitât des organizazions cravuatis al à criticât prin di dut il fat che tes tratativis pe gnove leç no jerin invidâts ni i cravuats ni i ongjarês, e no vuelin acetâ un peiorament de situazion juridiche: in  pratiche, la consecuence plui grave e je che «l’articul 7» – la Magna Charta des minorancis in Austrie, cemût che le clamin i stes cravuats – al pierdarà la sô validitât.
Josef Buranits, il puartevôs dal comitât cravuat al rimarche in particolâr che la soluzion di compromès carinziane e darà une bote negative ae situazion dai cravuats, ancje se i politics a nivel federâl e provinciâl a disin il contrari.
«Une posizion juridiche che no podìn acetâle, che si riferìs particolarmentri ae toponomastiche e ae lenghe uficiâl».
Di fat, vuê no si dopre il cravuat tant che lenghe uficiâl. te pratiche di ogni dì, si dopre dome inte forme orâl.
Il comitât di coordinament si domande cemût che al sedi pussibil che, tal câs dal plui grant grup di minorance, la lenghe no sedi doprade tant che lenghe uficiâl.
I cravuats a son cuintri il principi teritoriâl: un tierç di lôr al vîf al di là dal teritori tutelât
La segretarie gjenerâl dal centri cravuat a Viene Gabriela Novak-Karall, e à rimarcât che un tierç dal grup etnic cravuat al vîf a Viene, che no si trate di insediament autocton.
«Par chest motîf, o vin bisugne di une tutele moderne dai dirits di minorance che no je basade sul principi teritoriâl».
Critiche ancje di bande de Union Federaliste dai Grups Etnics Europeans (FUEV)_ La FUEV e saponte lis posizions dai cravuats e dai slovens. Pe FUEV nol è comprensibil parcè lis rapresentancis dal grup etnic cravuat no sedin stadis cjapadis dentri tal procès consultîf de gnove leç.
____________________________________________________
La organizazion slovene studentesche KSŠŠD
1923: students slovens a fondin a Viene la «Associazion dai Academics Slovens Carinzians».
1941:  dutis lis associazions slovenis a vegnin improibidis.
1961:  la associazion si stabilìs tal gnûf dormitori sloven par students «Korotan».
Il numar dai membris al va sù; politics inomenâts tant che il cancelîr Kreisky a visitin la associazion.
1970:  i membris a impastanin il gjornâl politic “Kladivoe”; a tachin a puartâ indenant azions in Carinzie, zontant il non sloven ai cartei monolengâi in Carinzie.
1973:  a organizrin grandis manifestazions a favôr de aplicazion dal articul 7 dal Tratât di Stât.
1976:  azions cuintri il censiment de minorance.
HAK
La Associazion Academiche Cravuate (Hrvatski Akademski Klub, HAK) e je stade impastande tal 1948 a Viene, dulà che si cjate – dongje di Eisenstadt – la sô sede. La organizazion e puarte indenant ancje il centri culturâl e educatîf cravuat di Viene. http://www.hrvatskicentar.at/
JANEZ ERAT

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +