Sfuei Mensîl Furlan Indipendent
Archivi de Patrie

Cui che nol vûl salvâ la scuele in Friûl

Dree Valcic
Il President Markus Maurmair

La Aclif e lance un apel ai Comuns: ma parcè la leç fin cumò no ise stade aplicade?

La Assemblee de Comunitât linguistiche il clap lu à butât, ma la onde creade intal sfuei no si è viodude. Dal rest, ce si puedial spietâsi des aghis fermis che a rapresentin la situazion dal Friûl vuê? Ce aie dit la Assemblee par bocje dal so president Markus Maurmair (foto) Che lis scuelis dulà che lis classis no rivin al minim di arlêfs domandât dal ministeri, a puedin gjoldi de leç che e previôt in cierts câs che si sbassi cheste cuote. Cuâi câs? Chel plui impuartant e che nus tocje di dongje al è chel che al indiche i comuns dulà che i istitûts a àn sede tant che apartignints a minorancis linguistichis. Dit in pocjis peraulis: dulà che si fevele par furlan, ma ancje par todesc o par sloven, si pues aplicâ cheste deroghe, permetint cussì di no vê di sierâ ples scolastics o di trasferî i fruts in altris comuns pes lezions.
◆ Une bataie che dîs agns indaûr il comun di Migjee al rivà a concludi in maniere in part positive; po dopo al è stât il cidin assolût su cheste oportunitât, intant che si moltiplicavin lis ocasions pierdudis devant di une problematiche che e leve indevant a colpî lis nestris realtâts. No dome chês plui piçulis, parcè che ancje lis citâts plui grandis tant che Udin, Gurize, Tumieç, Tisane, Codroip, e dutis chês che si son declaradis furlanofonis, a varessin podût doprâ la leç par evitâ dismantelaments e riduzions di organic.
◆ La domande precise e devente un at di acuse fuart che al cjape dentri la politiche e la direzion scolastiche regjonâl: parcè la leç no vegnie aplicade? Parcè devant di une pussibilitât reâl che si pues percori no si aial mai cirût di aplicâle in regjon?
◆ No si pues fâ fente di no savê, di ignorâ une leç dal stât! No si pues acetâ che la stesse e vegni doprade intal vicin Venit intai comuns che si son declarâts furlanofons – Gruâr, Fossalte, Puart e Tei – cul risultât di vê evitât lis sieradis in chest ultin.
A son agns, o ben di cuant che la leç e je stade istituide, che su chestis pagjinis o domandìn che si dedi il vie a cheste operazion, ma cence nissune rispueste de bande ni des autoritâts scolastichis ni dai stes Comuns, in particolâr chei de mont. Anzit, al somee che cheste opzion e vedi intiziât plui fastidi che entusiasim.
◆ Par gno cont, la oposizion principâl e rive dai sindicâts e no si capìs il motîf, viodût che ancje dal pont di viste ocupazionâl il risultât al sarès otimâl. E alore? Viodi ricognossût ae lenghe furlane un valôr particolâr, no dome a nivel culturâl ma tant che as puartant de specialitât in ducj i cjamps, al vûl dî acetâ la idee che ancje la scuele e puedi jessi pardabon autonome inte sô organizazion. Ancje par ce che al tocje i contignûts. Di fat, cui podaressial vê risiervis suntune didatiche furlane, cuant che propri in graciis de sô lenghe chel istitût al à mantignût la sô esistence? Cui podaressial evitâ che l’insegnament al fos finalmentri bilengâl, che la storie locâl e cjapàs sù un aspiet primari, ma che ancje al fos pussibil un percors curicolâr par dutis lis materiis e che no si ridusi ae semplice, e ancje cheste sopuartade mâl, lezionute cun filastrocje includude? E al è il probleme dai insegnants, dispès ignorants in merit al teritori là che a operin, che su chei vuê no ven esercitade nissune pression in chest sens, cu la consecuence che fâ scuele in Friûl al à la stesse valence che stâ in catidre in Lombardie o in Sicilie. In barbe ae specialitât e ae autonomie, e in non di un statalisim culturâl che al fruce ogni diversitât.
Se il mont de scuele, in dutis lis sôs componentis, al à lis sôs responsabilitâts, no je di mancul la politiche regjonâl che e à il primât de inerzie, e i motîfs – in maniere paradossâl – a son i stes che o vin incolpât i sindicâts: la pôre di vê di ricognossi al Friûl i dirits che al varès di gjoldi, di ameti cemût che dome doprant une lint identitarie si podarès dâ rispueste concrete ae situazion preocupante di chest teritori.
◆ Ur tocje ai Comuns racuei cheste sfide, aministrazions che fin cumò si son dimostradis pôc previdentis, masse dispès cun sindics plui orientâts “a no movi pucis” par no discontentâ i partîts di riferiment e i lôr capuçats.
◆ Al à di jessi clâr a ducj che al è un pont di svolte fondamentâl, no dome pal futûr des nestris scuelis, ma pe stesse sorevivence di tancj nestris paîs che a viodaressin inte permanence des sedis une font di energjie rinovade, di ocupazion, di sorevivence des piçulis realtâts comerciâls: in sumis, un segnâl di sperance devant di un impuariment progressîf di servizis.
◆ Impuartant dopo inte bataie pe autonomie, no dome pal ricognossiment de identitât furlane tant che fatôr di disvilup, ma pe afermazion che lis  leçs di difese des minorancis a esistin za e che a van aplicadis ancje se tancj a fasin fente di no cognossilis. No par câs. ❚

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +