Prins pas di autonomiscj e indipendentiscj daspò dal sucès eletorâl
Il risultât di un percors culturâl e politic che al à lidrîs antighis, ma che si à disvilupât in particolâr dilunc dai ultins agns e che il so caratar di fonde al è la capacitât di tignî dongje, cun ecuilibri e cun coerence, pragmatisim, ideâi, capacitât di dialic e di confront. Al è chel che al è saltât fûr des elezions “regjonâls” che a son stadis in Corsiche ai 3 e ai 10 di Dicembar stâts. In chê ocasion i citadins de isule, cul 56,5% dai consens tal secont turni a pro de coalizion nazionalitarie “Pè a Corsica” (che e veve za cjapât il 45,36% dai vôts tal prin), a àn fat une sielte fuarte, clare e par nuie casuâl a pro de aleance tra i autonomiscj di “Femu a Corsica” e i indipendentiscj di “Corsica Libera”, che si presentavin adun cuntun program che tra i siei ponts di fonde al previôt la couficialitât de lenghe corse, une soluzion pe cuistion dai presonîrs politics e il statût di resident par fâi cuintri ae speculazion edilizie.
Lis elezions pe gnove Coletivitât Teritoriâl uniche de Corsiche, che i àn dât a “Pè a Corsica” ben 41 dai 63 puescj disponibii inte Assemblee de isule, a segnin un cambi culturâl che al tocje dute la societât di chenti. Di une bande l’eletorât cors al à premiât la azion dal guvier vuidât dal autonomist Gilles Simeoni e de Assemblee cun a cjâf l’indipendentist Jean-Guy Talamoni, che dal 2015 al 2017 a àn inviât il percors istituzionâl de fusion tra la Coletivitât precedente e i dipartiments de Alte e de Basse Corsiche, che al vignarà completât vie par chest an. Di chê altre al à mostrât, in maiorance, la volontât che lis cuistions che a tocjin chê comunitât e i siei rapuarts cul Stât francês, cu la Europe e cul mont a vegnin frontadis cuntune vision e cuntune atenzion che a sedin “de Corsiche” e “pe Corsiche”.
Chest ategjament si lu vualmave za doi agns e mieç indaûr, cu la prime vitorie tes elezions “regjonâls” de bande de aleance, e si à palesât ad implen juste vie pal an passât, a tacâ des elezions politichis di Jugn, là che 3 dai 4 puescj di deputât ju àn vuadagnâts propit i candidâts nazionalitaris. Cun di plui tes ultimis regjonâls, dongje de afermazion di “Pè a Corsica”, tal prin turni al è stât ancje il risultât di “U Rinnovu”, altre fuarce indipendentiste che e à cjapât il 6,69% e che par pôc no à rivât a passâ il soiâr dal 7% par fâ il secont turni e par jentrâ te Assemblee.
Propit la presince e il risultât di “U Rinnovu” e salacor ancje la sô sielte di no imparintâsi cun “Pè a Corsica” te balotazion a son un altri segnâl fuart dal cambiament che al è in vore te isule, là che e esist une vision di Corsiche, condividude di tancj di lôr ancje se cun ategjaments diferents, che e je alternative e salacor antagoniste rispiet a chê che a àn a Parîs.
Il spieli di chest al è il ridimensionament di ducj i partîts unioniscj e in particolâr di chei di çampe e di centriçampe. Altris elements impuartants a son stâts l’impat dal cambiament istituzionâl inte direzion de unitât aministrative, la incressite e la evoluzion positive de cussience identitarie e la crisi di chel sisteme clientelâr “tipic” di une cierte Corsiche “francesissime”, che si à palesade ancje tal astensionisim fuart (48%).
Cumò, inte suaze de aministrazion de Corsiche e de politiche pe Corsiche, i doi rapresentants principâi de coalizion – Simeoni e Talamoni – a varan di fâsi sintî e di fâsi scoltâ di Parîs. Dopo doi incuintris interlocutoris in Zenâr cui rapresentants dal guvier, che pal moment si son mostrâts sorts denant des propuestis di “Pè a Corsica”, si cjataran in curt cul president Macron. Viodarìn ce che al nas.
di Marco Stolfo