Cormons e onore Dolfo Zorzut cuntun premi leterari che al celebre il plurilinguisi di cheste tiere

Cormons: ogni 2 agns, la Mont Quarine e vîf une gnove creazion. Cuarp di pinsîrs e peraulis; forme in prose e poesie; espression di lenghe furlane, taliane, slovene. Il premi leterari Dolfo Zorzut (1894-1960) al onore un Cormonês che, cul folclôr, al è rivât a spalancâ la anime dal popul.
Insiemi Comun, “Amîs da Mont Quarine”, “Societât Filologjiche Furlane”; patrocini de Provincie di Gurize; di gale il contribût dai grancj, parfin di tieris lontanis.
Ca, si fermìn a contâ alc de zoventût che e studie: di lì il mont al va indevant.
Al à vint un frut de II A, medie di Cormons; une conte une vore frescje; frasis e i periodis no si strachin; a cjapin viemence de puntegjature ben spindude.
E va indevant imbombide di savôr, ironie e e cjate simpri jutori tal paradòs, tal strani, fin a fâ sparî la peraule e fâ cjantâ letaris in secuence.
Implant sempliç: 4 amîs a decidin di vivi une corse cun tante int pai Cuei.
Biel che a van, si imberdein tune piste fûr des stradis e si pierdin. A saltin fûr amcje i cenglârs (il titul al è propit “E se incontriamo i cinghiali – Una corsa sul Collio con gli amici”)…
La fin e je che ju cjatin: prime i gjenitors si solevin, dopo si inrabiin. Dite cussì, e je sclagne, ma i  4 fruts cormonês a son gjoldibii, origjinâi, cun prose che e scate e e ten vîf il letôr dal principi ae fin.
Tono – dut intun – delicât, sempliç e profont, tal test, segnalât, di Rossella Dosso: medie cormonese, III D.
Cul merit di jessi une vore necessarie pal dizionari biografic “Lirutti”, dulà che dal protagonist no si cjate olme, e je une delicade storie di amôr e di muart tra Arturo Dosso e la sô Matilde.
Lui, di Caprive, lauree in dirit a Graz, al insegnave cun jê a Gurize tal Staatsgymnasium, ambient culturâl di stratosfere par docents e students.
Arturo, come chei altris inteletuâi di confin de epoche, al supà culture no dome juridiche (fin a cjoli part a la riforme dai pats colonics), ma ancje leterarie, storiche, filologjiche, tant di jessi anime de riviste “Forum Julii”; di fat e je muarte pôc dopo di lui.
In tieris di frontiere, al sondave culture di frontiere, studiant cu la filologjie, la storie di oms e feminis che a fevelavin furlan e sloven, ma cul patrimoni di tantis altris lenghis.
Al è stât lui a scuvierzi Dolfo Zorzut e a tirâlu drenti – autôr – in Forum Juli: al veve 18 agns.
Il scrivi di Rossella al è delicât, di cûr e di çurviel; al rive a cjareçâ int e lûcs che a son dolçs pardabon tant che lis sôs peraulis. ❚
✒ Ferruccio Tassin