Sfuei Mensîl Furlan Indipendent
Archivi de Patrie

CONTE. Une veretât une vore ordenarie

............

Meni Piçul, cuarantetrê agns, sindic di Rivestuarte, nol è muart tal so jet ni ta chel di un Ospedâl.
Lu àn cjatât denant de glesie dal paîs, dongje dal Monument, cu la cope sfracaiade mieze dentri de vascje des trotis dulà che la aghe, par vie dal sanc che al sborfave fûr dutun cu la sostance cerebrâl, e gambiave plan planc colôr e i pes a levin su e ju ducj sbalsamâts par chê che e someave une gnove cualitât di pasture.
A jerin lis sîs e mieze di une domenie matine di març dal mil nûfcent e setante. Cuatri veçutis di chês di une volte, usadis a durmî pôc e a preâ tant, a stevin lant ae prime messe, chê piçule, chê dai puars, cence cjantose e dite su in premure di un capelan zovin e mieç indurmidît.
Menie Scussule, cuant che e à viodût il cadavar di chel biât, e à scomençât a berlâ e po dopo al è stât dut un coro.
Il capelan, saltât fûr de glesie di buride, al à butât un bleon su chel puar cuarp. Il plevan pre Masin, un bocon di mostro grant e grues tant che un Don Camillo, al è rivât tignintsi i bregons cu lis mans parcè che te presse al veve dismenteât lis tiracjis in canoniche e al à clamât subit i Carabinîrs.
Chei a àn investigât par une setemane cence tirâ fûr un ragn de buse.
Meni al jere sposât cence fruts. La sô femine, di non Lise, casalinghe e un pôc çusse, lu veve viodût jessî di cjase chê matine buinore vistût par lâ a pescje. Lu veve come simpri saludât cun afiet e come simpri lui i veve rispuindût cuntune rugnade. I lôr rapuarts aromai a jerin chei: lui paron, jê sclave, lui che i consegnave une piçule part dai bêcs che al vuadagnave in Regjon, jê che e spindeve cun tante prudence chei cuatri francs, stant ben atente a comprâ dome chel che al voleve lui, a cusinâ dome chel che al plaseve a lui e vie indenant. Ses nuie o cuasi, dome cuant che lui al veve la lune juste e ancje li cence tantis mignagnulis, a cunin vie se o capîs ce che o vuei dî.
La cariche di Sindic no podeve scuindi nuie di losc. Rivestuarte al jere un paîs fûr dal mont, cuatri cjasis, dôs stradis,une  place e un cjampanili, il dût spierdût tal mieç de campagne. Un pâr di fabricutis e une  disine di artiscj a tiravin indenant dome parcè che  chei a jerin agns bogns e par falî e coventave tante buine volontât.
Cussì nuie piste politiche, nuie piste sentimentâl parcè che a Meni i bastave doprâ la femine a so comut, nuie piste di bêcs parcè che il Sindic nol veve ni debits di paiâ ni credits di scuedi.
A la fin de gjostre il Magjistrât al à scugnût sierâ il câs “per essere ignoti gli autori del reato”.
Ma no Pre Masin, chel no si rindeve.
Al jere un grant letôr di libris zâi e chest lu judave a parâ vie la smare che lu inmaneave in chel paîs dulà che al jere costret a vivi, in chel lûc infam dulà che il cidin al faseve di paron di buinore fin gnot.
E cussì a fuarce di lei al veve svilupât une sorte di predisposizion a investigâ e a sberdeâ i câs ingherdeâts.
Il delit al jere di sigûr opare di un dal paîs e lui al saveve dut di ducj o cuasi. In chê volte la int e leve a confessâsi prime di comunicâsi no come cumò che  ancje i patafebancs a van a gloti la particule cuant che ur pâr e plâs cence netâsi prime la anime, di gracie un at di dolôr e vie . E po il plevan al jere considerât un pari o un  fradi maiôr che di lui si leve a sbrocâsi cuant che si barufave in famee, a domandâ consei cuant che un fi al tirave a mostro o i afârs a levin mâl.
Pre Masin al tacà a tignî lis orelis ben spiçadis su ogni vôs che e zirave in paîs, a butâ une peraule ca e une là par viodi se al rivave  a tirâ su cualchi passarat, a vuardeâ ben  lis sôs pioris par capî se cualchidune di lôr e  gambiave tenôr di vite o mût di compuartâsi
Nuie ce fâ. Nissun al diseve nuie, nissun al faseve coments, ducj a vivevin come prime, cuasi che chel trement fat di sanc al fos sucedût in Sicilie e no in Friûl.
Ma une dì che al veve a pene finît di lei chel famôs romanç zâl dulà che ducj a cirin une letare par ducj i cjantons de cjase cuant che invezit e je in biele mostre sot i  voi di ducj, al capì che la veretât e je dispès une robe une vore semplice che si pues scuvierzile cence fadie se si è bogns di cjalâ la realtât in muse, te sô semplicitât e cence i parevoi.
Chê sabide Lise, la femine dal muart, e je vignude  a confessâsi di lui, come che e faseve ogni cuindis dîs. Ogni volte i contave  un grum di stupidagjinis che a ben viodi non jerin ancje pecjâts (invidie par lis gnovis scarpis di chê dongje, distrazions tal preâ e vie indenant).
Ma pre Masin, za sul troi di vuere, no le à fate jentrâ tal confessionâl ma al à intindût di staronzâle ben e no mâl tal so tinel, cjalantle drete tes balis dai voi.
Lise e je lade daûr dal predi, cidine e umile  come simpri, cul so puar cuarp legnôs involuçât tal vistidut di regadin grîs e la muse di piore spaventade che  e veve di cuant che  e jere nassude.
Pre Masin al à distrigât di corse lis formulis e lis preieris di rît po si è jevât in pins, grant grues e furiôs  tant che Mosè cuant che, vignût ju dal Sinai cun lis taulis de Leç in man, si inacuarç che la sô int impen che preâ e gjolt..
“Ca denant di me e dal Signôr confesse  – al à tonât – tu âs copât tu il to om”
“Propit cussì- e à dit Lise, cu la sô vôs clipe, cence mudâ la sô espression ovine.
Il plevan si è sintât, copât. Si sarès spietât che Lise e dineàs e vaìs, che e berlàs la sô inocence e invezit chê biade femine e ameteve dut come se e fos stade denant dai Carabinîrs.
“Parcè lu âstu fat ? ” al à cjatât la fuarce di dî Pre Masin intun suspîr.
” Parcè ? ” – e à tacât Lise  e cumò la sô vôs e jere sigure e i voi a lusivin come boris e la sô muse no someave plui a chê di une piore ma pitost a chê di une zovine leonesse.
“Parcè che no podevi plui di jessi tratade come un ogjet, di volê ben a un che mi stimave mancul de gjate che o vin in cjase. Parcè che no rivavi a vivi cuntun che a lis mês puaris cjarezis, fatis cun tant afiet, al rispuindeve rugnant. Che no mi à mai tignût a part dai afârs di famee. Che il prin dal mês mi deve cuatri francs tirâts e cun chei o scugnivi meti dongje ogni dì gustâ e cene e se o vevi bisugne di un pâr di cjalcis o vevi di domandâi par plasê comprimilis tu, stant che no si fidave nancje a mandâmi di bessole te buteghe di Marie Gusiele. Un om che mi cjalave simpri cun dispresin parcè che o soi brute e no ai ni diplome ni mistîr, une çusse buine di nuie nancje di dâi un frut. Po cuant che i vignive voe di taconâ mi doprave come un strument di gjinastiche o une pipine di gome, no une peraule d’amôr, al pensave dome a scjariâsi prime che al podeve e subit dopo  si voltave di chê altre bande.
Cussì cumò al sa parcè che o ai copât  gno marît. Par no savê ce fâ, parcè che o jeri strache di une vite di sclave, dulà che o scugnivi sopuartâ dutis lis sôs tristeriis par un plat di mignestre e une sclese di companadi.”
Pre Masin si jere scrufât te poltrone e al someave che al fos deventât di colp piçul e sclagn sot il pês di chê veretât tremende e dutun ordenarie. Gotis di sudôr i spissulavin jù pal çarneli tant che la  ploe ju di une gorne crevade.
“No pues assolviti – al à cisicât – parcè che no tu sês pintude ma nancje denunciâti parcè che tu mi âs fevelât in confession sot il vincul dal segret.”
“E alore lassìn lis robis cussì come che a son – i rispuindè Lise – Che al dismentei chel che i ai dit e amîs come prime. Buinesere”.
E cence dî altri e à dât lis spalis al predi, po e je lade viers de puarte de canoniche, piçule, secje e simpri involuçade tal so vistît di regadin, cu li sôs gjambutis stuartis e il cûl che al pindulave tant che un meluç frait.
Ma il so pas al jere fer, fuart e sigûr come chel di un Agnul vendicadôr. ❚
O publichìn vulintîr cheste conte zale di Adriano Nascimbeni, za premi S.Simon 2010

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +