Sfuei Mensîl Furlan Indipendent
Archivi de Patrie

CLIME. Un Invier, e no dome, masse sut

............

Nol plûf aromai di mês, o miôr lis precipitazions vudis di Avost dal 2011 in ca (intant che o scrivìn o sin ai 25 di Març) a son pardabon sot de medie, fale il mês di Otubar dal 2011 che al à vût dâts avonde in linie cui dâts storics. E ce che al è plui significatîf e je la durade di chest sut.
Propit par chest o vin sintût i tecnics dal Osmer che nus àn sclarît miôr la situazion.
Prin di dut al è avonde normâl che i prins mês di ogni an a presentedin scjarsis ploiis e di fat ancje tal periodi Dicembar 1989-Fevrâr 1990 si à vût un prin trimestri cun dâts avonde dongje a chei di chest an. Ma se o lin a paragonâ cualchi dât plui indaûr o scuvierzìn che dal 1961 a vuê a Udin, dal Prin di Avost ai 20 di Març nol à mai plot cussì pôc come chest an. Agns paragonabii (cun mancul di 500mm di ploie) a son stâts il 1975-1976 e il 1985-1986.
Ma ce che o vivìn ta chescj mês suts no si pues considerâlu un gambiament climatic, che invezit al rivuarde lis temperaduris dal ultin secul.
TEMPERADURIS IN AUMENT_ Al è aromai sigûr che rispiet ai secui XVI-XIX, cuant che o vin vude une “piçule ete glaçâl” cun temperaturis plui bassis di cumò (al jere avonde normâl che ancje a Udin a colassin sui 50cm di nêf tun an), tai ultins 150 agns la temperature medie anuâl si è alçade di cirche 1° celsius. Massime tai ultins decenis si à rilevât une cressite impuartante des temperaturis, in particolâr estivis.
ISTÂT PLUI LUNC E PLUI CJALT_ L’Istât al è la stagjon che e je gambiade di plui ta chest ultin secul e mieç parcè che no dome la medie stagjonâl si è alçade di 1,5° celsius, ma la durade si è slungjade: di fat se prime si vevin no plui di 15 dîs di grant cjalt che si concentravin tra Lui e Avost, cumò lis misurazions dai ultins agns a confermin che la stagjon estive e à cjapât dentri ancje Jugn, e vie par chei tre mês si puedin alternâ ancje plui setemanis di grant cjalt.
PLOIE E NÊF_ Pes ploiis e lis neveadis la situazion e je mancul clare rispiet al teme “temperaduris”, e il segnâl dal gambiament climatic mancul evident: baste ricuardâ dome che il 2010 al è stât un dai agns che al à plot di plui tal ultin secul. Ma al è un dât evident che invezit il 2011 nol à vudis lis precipitazions che si sperave, e no dome in cont di ploie. Di fat la stagjon turistiche invernâl de mont furlane e à patît chest an pardabon pocje nêf e al risulte avonde ecezionâl viodi a metât di Març il ricès Marinelli sot dal Coglians cence nêf. Lis conseguencis no son negativis dome pe economie turistiche: se di Invier nol nevee al cres il pericul che la mont e cjapi fûc (propit parcè che di Zenâr a Març a son i mês dal an plui suts); lis risiervis di aghe in Primavere e Istât a laran in crisi e cun di plui si à une cressite gjenerâl de temperature invernâl parcè che vie pal dì la nêf se no je no riflet la lûs e il calôr dal soreli e vie pe gnot al ven a mancjâ l’iradiament, ven a stâi chel efiet di frêt che al è tipic des superficiis innevadis.
Cheste situazion e cjape dut il mês di Març, ma no si pues fâ, stant l’anticip, une prevision par Avrîl, parcè che une setemane al è il limit massim par previsions realistichis su la nestre regjon. ■
Christian Romanini

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +