Cjarlins al scree l’Istât cu “La Patrie sot dal tei“

Un incuintri segnât di une buine dose di furlanetât “sane e cussiente”. Al è chel che joibe ai 16 di Lui a Cjarlins al à screât la serie di apontaments cu “La Patrie Sot dal Tei”, là che a vegnin presentâts i contignûts dal nestri gjornâl e là che si fevele di Friûl e dal rest dal mont, di storie, di culture e di atualitât. Tal Parc dai Marinârs dal paîs de Basse, il confront di ideis al è stât inviât cuntune riflession interessante su lenghe e identitât fate dal sindic di Cjarlins, Loris Bazzo, e si à disvilupât cui intervents dal diretôr de Patrie, Walter Tomada, e dal president de Clape di culture Patrie dal Friûl, che e je la editore dal gjornâl, Andrea Valcic. Cun di plui, a àn contribuît ae riflession altris dôs firmis dal gjornâl, o ben l’ex diretôr Andree Venier, che al à pontade la sô atenzion sul ûs de lenghe furlane intai media e in particolâr intes rêts sociâls, e Diego Navarria, ex sindic di Cjarlins e ex president de Assemblee de Comunitât linguistiche furlane, che al cure une rubriche dedicade ae storie dal Friûl e dai patriarcjis. Cun di plui, a àn zontât alc di interessant ancje diviers di lôr, tacant di Ivan Petrucco e di Andrea Dri, sindics un di Cjasteons di Strade e chel altri di Porpêt, fin al sindicalist Roberto Muradore.
◆ L’incuintri di Cjarlins al à screât ancje il cartelon di events pal Istât, #CarlinoEstate2020, metût adun – cemût che e marche la assessore pe culture dal Comun, Veronica Vicentini – «cul intindiment di dâ une rispueste direte, chi intal nestri teritori e in sigurece, tal rispiet des normis anti Covid-19, ae dibisugne di culture, di condivision e di socialitât de nestre comunitât», cuntune schirie di apontaments, jenfri musiche, cu la Bande in place ai 7 di Avost, cine, cu la proiezion dal film “ulle ali dell’avventura”, leturis pai fruts, ai 4 e ai 11 di Avost, e une buine dose di teatri cui spetacui di Teatrino del Rifo, Teatro Incerto e Dino Persello. Par savênt di plui al è ben contatâ la Biblioteche di Cjarlins cul telefon (0431/687831), cu la pueste eletroniche (biblioteca@comune.carlino.ud.it) e cun Facebook (Biblioteca di Carlino). ❚
Redazion