CJARGNE. XXXIII Marce de pâs

Par cjapâ part no coventin tropis robis: l’impuartant al è jessì vistîts pesantuts e vê voie di cjaminâ, ancje parcè che de plaçute di Zui a Sant Pieri a vuelin cirche dôs orutis. Intal percors a vegnin fatis trê polsis indulà che si pues cjapâ flât e scoltâ lis riflessions (cun riferiment a bocons dal messaç dal Pape voltâts par furlan), cjants e orazions. Chest an, te prime polse, finide la leture dal messaç dal Pape sul teme “I responsabii de educazion”, al è intervignût pre Alessio Geretti. Il so intervent al è stât soredut un ringraziament ai siei gjenitôrs che cun semplicitât i àn di simpri tramandât une grande educazion religjose e une vere scuele di vite.
Il secont intervent, sul teme “educâ ae justizie”, i è tocjât ae dotore Nives Baldacconi che e à fat riferiment a problematichis peadis ae societât moderne cun particolâr riferiment ae figure de femine e soredut su la impuartance de figure dai gjenitôrs intes fameis.
Te ultime polse, cul teme dal Pape che al trate di “educâ i zovins ae justizie e ae pâs”, o vin podût scoltâ pre Pierluigi Di Piazza che cun scletece al à riclamât ae memorie lis tantis vitimis de violence, des vueris, lis contradizions de societât di vuê che e va indevant a spindi sui armaments; al à puartât  tant che esemplis lis figuris che àn vût coerence te lôr vite come don Milani, pari Turoldo, pari Balducci. E fra ducj, doi personaçs che si son batûts cu la no violence cuintri la violence par fâ sù la pâs: Gandhi e Martin Luther King.
Il teme dal Pape al è stât frontât ancje dal vescul Mazzocato che al à presiedût la messe grande inte plêf  Mari di Sant Pieri.
Ancje chest an si son viodudis tantis personis, di ogni etât. La marce de pâs dal sigûr e je une maniere difarente par saludâ il vecjo an e par spietâ chel gnûf. E pues jessi une alternative valide aes solitis grandis cenis di fin dal an o aes solitis fiestis di place.
Ciert, la strachece a une cierte ore si fâs sintî, ma prime di tornâ a cjase, li de Polse di Cougnes ti spiete un bon brulè dongje di une fete di paneton, juste par no dismenteâ dal dut la tradizion e par scomençâ benon l’an a pene rivât. ■
Marta Vezzi