CJARGNE VIVE. “Ce cal conte” di Elena Pittino

A Cjadugnee, a 5 km di Tumieç, si cjate il laboratori di restauri e artesanât “Ce cal conte”. «Jo o partìs dal mont dal restauri – e dîs la zovine Elena Pittino –,  par agns o ai lavorât cun ditis che a fasevin tant restauri che afrescs. Ma par lavorâ in chest mont tu âs di lâ fûr. Dopo mi soi fermade, mi soi maridade. Ma mi è simpri restade la voie di ideâ robis gnovis e particolârs. Cheste voie le ai ereditade ancje di gno nono. Lui al faseve cuadris e di solit, dongje o daûr dal cuadri, al tignive scritis dutis lis storiis, i mûts di dî, lis detulis dal paîs, e al cjapave note ancje intun cuader che jo o ai tignût da cont. Di achì e cjape vite la idee de mê gnove linie e al nas il laboratori “Ce cal conte”. Ce che al conte al à un dopli significât: il prin riferît al valôr dal prodot di artesanât artistic (ogni singul toc al ven fat a man) e il secont parcè che ogni prodot creât al à la sô storie di contâ.» Inte rimesse, mudade in negozi, al è plen di animaluts colorâts fats cuntune resine particolâr e ognidun di lôr al à la sô storie scrite intun bilietut.
«A son tantis dificoltâts burocratichis – e va indenant Elena che e je ancje rapresentante de Confartesanât pal setôr dal artesanât artistic – e soredut no ai vudis agjevolazions di nissune sorte. Par fâ cognossi il gno prodot, o cîr di jessi presint a dutis lis manifestazions di artesanât e chest al è par me un grant sacrifici: o lavori dal lunis ae sabide, e la domenie o voi pai marcjâts, duncje no ai une zornade libare par cirche 9-10 mês ad an. O lavori tant ancje su ordinazion: al è il cjaçadôr che mi ordene di fâ il gjal cedron, il cjavrûl; mi è capitât ancje di fâ animaluts che no fasin part de nestre tiere (elefantuts, furets…). Al è trê agns che o fâs chest mistîr e o ai inmò tancj obietîfs: slargjâ simpri di plui la produzion, rivant cussì a finî di fâ altris storiis. Ideis no mi mancjin, forsit ce che mi mancje al è il timp.
Chest an tantis ativitâts di artesans a àn scugnût sierâ. Ma par un zovin che al à di vierzi une ativitât i disarès che prin di dut al à di vê une buine idee e dopo al scuen fâ tancj sacrificis. Une biele robe e je che, no jessint sot paron, si decît di bessôi ce fâ, trop e cuant fâ.» ■
Marta Vezzi