Sfuei Mensîl Furlan Indipendent
Archivi de Patrie

CJARGNE. Seconde edizion dal premi Baston di San Pieri di Cjargne

............

Ai 6 di Avost, tune biele suaze di fieste e di cjants, te Plêf Mari de Cjargne si è tignude la seconde edizion dal Premi “Baston di San Pieri di Cjargne”. La iniziative e je partide tal 2014 de Arciconfraternite dal Spirt Sant Pieres vives; par dâ public ricognossiment a personis o a grups di personis che si son metudis in lûs pal lôr impegn spirituâl, culturâl e artistic, sociâl e umanitari, ispirât a valôrs cristians, al servizi de societât umane e de comunitât cjargnele in particolâr.
Il Baston di San Pieri al è il simbul di un cjaminâ tal troi dal Vanzeli e dal progrès spirituâl e civîl de umanitât (il premi, di fat, al ven dât a une persone che e presente une vite di esempli secont il Vanzeli e che e opare pal ben de societât).
La fraterne e je une istituzion che e à par finalitât la promozion di une caritât spirituâl, culturâl e sociâl pal popul di Diu e par ducj, e e cure ancje la conservazion e la protezion de Plêf Mari di Sant Pieri.
La Zurie formade da Bons. Pietro Brollo, Antonio Martini (ex president dal Consei Regjonâl), Battista Molinari (sindic di Zui), Bons. Giordano Cracina (prevost di Zui) e Renato Cracina (gjornalist) e à sielt lis personis di premiâ: Sûr Maria Luisa Candotti, Marco Marra e Paolo Agostinis.
A lôr ur è stât consegnât il Baston di San Pieri, la figure dal sant in len intaiât suntun mani di vilût di colôr zâl pal cjamp spirituâl, blu par chel culturâl e ros par chel sociâl, e une pergamene scrite a man cu la motivazion personâl di assegnazion. Tal cjamp spirituâl a Sûr Maria Luisa Candotti di Fors Disore: «Lant daûr aes olmis dal Sant Antonio Maria Gianelli, e à dedicade la vite interie ai fruts cjargnei e no dome dant fûr cence sparagnâsi timp, afiet, atenzion, disponibilitât, comprension, metint cûr e passion tal spirt plui gjenuin che si supe dal Vanzeli».
Tal cjamp culturâl e artistic a Marco Marra di Dimplan: «Une vite interie dedicade al mont de culture e de difese dal patrimoni storic artistic, culturâl e ambientâl de tiere di Cjargne; tra lis sôs passions ancje la poesie e la piture dulà che al à segnât la sô olme ben marcade».
Tal cjamp sociâl e umanitari, a Paolo Agostinis di Cjanâl: «Miedi che al fâs dal so lavôr une passion e une mission no dome tal ospedâl cjargnel, dulà che al vîf il so rapuart cui malâts, ma puartant la sô professionalitât e umanitât ai fruts dai paîs in miserie de Bolivie, Kenya, Guinee Bissau, Etiopie e Tanzanie».
I trê premiâts a àn pandude une grande contentece e sodisfazion tal ricevi chest ricognossiment. Sûr Maria Luisa cun umiltât e à dit: «O vûl jessi in chest moment semplicementri tant che rapresentante di tantis feminis che a meretin il premi plui di me. Lôr a son stadis don par chei altris cu la fantasie dal ben. A àn jemplade la lôr vite di sens e di gjonde!» Ancje il miedi Paolo al à dedicât il so premi a dutis lis personis di buine volontât: «O dîs dome che si è tirade une cjadene tra i paîs da la Afriche e la Cjargne, ma jo soi dome un anel di cheste cjadene e tancj progjets a son stâts puartâts indevant midiant di altris anei e cualchidun al è in cheste sale. Jo o dedichi chest baston a dutis chestis personis!»
Marco al à sotlineât la contentece di jessi restât in Cjargne: «Jo no ai mai tradide la mê tiere e di fat no soi mai lât vie, nancje cuant che o vevi pussibilitâts di caratar professionâl. O ai simpri refudât parcè che o ai volût continuâ la mê vite achì e lâ indenant a dâ in positîf chel che o pues par cheste tiere.»
Il premi al à une cadence bienâl. Cui che al vûl (tant personis che ents o associazions) al pues mandâ la propueste cuntun piçul curriculum de persone candidade dentri dal 31 di Dicembar dal 2017 ae Confraternite (te sede di Polse di Cougnes, intal Comun di Zui). ❚
✒ Marta Vezzi

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +