CJARGNE. La dipendence des machinutis

In chescj ultins timps e je in voghe une gnove dipendence: chê dal zûc di azart. Tal nestri stât, cheste dipendence e cjape dentri bielzà 700 mil talians di ogni fasse di etât. Ancje inte nestre piçule realtât di mont, tantis a son lis personis che a colin dentri in chest ingranaç pericolôs.
A Tumieç, e no dome, al è di un pôc che a vegnin puartadis indevant un grum di iniziativis cuintri lis salis da zûc e par difondi une prevenzion su lis dipendencis dal zûc. Intal contest comunâl, la assessore Cristiana Gallizia e à cjapât a cûr la cuestion e e à inviât un plan di lavôr che al previôt la osservazion e il monitoraç des dipendencis dal zûc e al studie lis azions di cjapâ sul plan de prevenzion, interessant ancje fuarcis dal ordin, scuelis, oratoris, parochiis, insegnants, e v.i.
A nivel scolastic, l’ISIS Paschini al è stât il prin istitût che, lunis ai 23 di Avrîl, al à dedicade une assemblee par cognossi plui in sot il probleme cul diretôr dal SERT, dotôr Gianni Canzian.
In cheste campagne di sensibilizazion, ancje il comitât “Carnia in movimento” al à dât il so contribût organizant une cunvigne interessante che si è tignude sabide ai 28 di Avrîl. Cinc esperts (Rolando De Luca psicolic, psicoterapeute responsabil dal centri di terapie par ex zuiadôrs; Maurizio Marconi de associazion ex zuiadôrs di azart; Adriano Segatori psichiatre; Gianni Canzian, diretôr dal SERT Friûl de Alte; Giorgio Venier Romano, promotôr dal dissen di leç regjonâl cuintri l’azart) a àn contât parcè che la Italie si è mudade intune grande “Las Vegas” e a àn dadis istruzions su cemût fâ par no colâ dentri te vuate dal zûc, e cemût fâ par rivâ a jessî.
Chestis iniziativis a saran forsit dome une gote intal mâr, ma l’impuartant al è di rivâ a fâ capî aes gnovis gjenerazions che no si pues vuadagnâ facilmentri cence lavorâ, soredut cumò, inte crisi economiche che o stin vivint. «Bisugne savê preseâ ancje lis robis negativis – e dîs la Gallizia – se chest al covente par mantignî un rapuart cul nestri teritori: une tiere che no je tutelade di leçs seriis, une tiere che nus à dât di mangjâ ancje in timp di vuere». Sigurementri, devant di chest probleme l’imobilisim al è il piês ategjament che si pues tignî. ■
Marta Vezzi