CJARGNE. La B.Eng SRL di Tumieç

Tal 2004 Giovannino Bearzi, dopo une esperience trentenâl tal mont des lûs par machine fate inte Seima di Tumieç (vuê Automotive Lighting), al mole il so puest di lavôr par vierzi une imprese dutune cui siei doi fîs Matteo e Elvis; la esperience di lavôr di Giovannino e chê di scuele dai siei fîs an fat nassi la B.Eng s.r.l..
La B.Eng e progjete e e fâs lûs e proietôrs par machinis e in particolâr, soredut, par chês di lusso e e je rivade adore a fâsi cognossi e a taiâsi fûr une precise fasse di marcjât.
«O lavorìn in dut il mont – al conte Giovannino – in particolâr in Italie (cu lis plui grandis cjasis automobilistichis come Ferrari, Pininfarina…) ma ancje tal forest cun BMW, Audi. O lavorìn in Turchie, ancje cuntune aziende cinese – e Giovannino al zonte ridint – globalizazion e vûl dî ancje lavorâ cui cinês! O vin di cjalâ dut: i interès dai miei fîs par vê un doman ma ancje chei dai dipendents dant une garanzie di lavôr ancje a lôr. I miei dipendents a son ducj a timp indeterminât e chest o ai voie di marcâlu ben, parcè che a un zovin tu âs di dâi la pussibilitât di vê un doman. Il motôr de aziende nol è Giovannino Bearzi ma i miei fîs e i miei dipendents.»
Cuant che e je nassude la aziende Matteo al seguive la part dai stamps, cumò al sta daûr a la part comerciâl: clients, furnidôrs e vie indevant.
Matteo al conte che «al è un impegn. Nol è che tu sês un dipendent e tu lavoris da lis 8 a lis 5 di sere. Ma tu lavoris 24 oris parcè che ancje tal jet ogni tant tu pensis a ce che tu âs di fâ la dì dopo. A mi capite spes di lâ a Torin o atôr pe Europe a contratâ i presits e a puartâ dongje lavôr pe aziende. Duncje al è un sacrifici tant par me che pe mê famee parcè che o soi pôc a cjase. Di base si lavore 12 oris in dì. O varès podût lâ a lavorâ in altris puescj, ae fin o soi restât achì. Li che si a nas al merete di stâ. Come teritori o sin defilâts. Tal gno lavôr specific jessi in Cjargne a vûl dî jessi tal mieç dal Europe: in 4 oris tu sês a Torin e in 4 oris tu sês a Monaco. E tal gno setôr o sin in tun pont strategjic. Jessi te citadine di Tumieç a vûl dî jessi plui fortunâts rispiet a atris zonis de Cjargne pal fat des comunicazions. Nô che o lavorìn cun ducj i clients dal mont e cun internet o vin di vê une cierte tecnologjie; se si cjatassin intun altri paîs da Cjargne no rivaressin a fâ nancje une video conference. La Cjargne e sarès di svilupâ in chest sens. Ancje une semplice telefonade di chi in Cine o in Americhe tu le fasis par internet.”
Ma al di là di dut, Matteo al à la sperance che lis robis a puedin cambiâ e intant ancje lui al sta tal so piçul dant une man a cheste tiere: «Mi auguri che la B.Eng e cressi simpri di plui. O vin intenzion di cambiâ sede e cjoli un capanon par cjapâ su simpri plui int cjargnele.»
Cjalaitsi ator cuant che o viodês lis lûs des machinis: a podaressin jessi nassûdis propit in Cjargne! ❚
✒ Marta Vezzi